West Ham defender thar Masuaku

London club West Ham chuan Olympiakos aṭangin defender Arthur Masuaku an lalut a, French left-back manah hian pound maktaduai 6 insengin season li chhung an hnena khel turin contract an ziahpui. Hammers hian an left back Aaron Cresswell chu khup hliam vangin thla li chhung an chhawr thei dawn lo a, kum 26-a upa defender hmun ruak luah tur hian Masuaku hi an lalut ta a ni.

Ligue 1 club Valenciennes aṭanga bul ṭantu Masuaku chuan, "Ka agent nen ka hmalam hun chungchang kan sawi dun a, West Ham-in min duh tih ka hriat khan ka inngaihtuah nawn tawh lo. Premier League hi khawvela league lian ber a ni a, he league-a inlan ve hi kum 18-a upa ka nih lai aṭanga ka lo suangtuah tawh ṭhin chu a ni," tiin a duhthusam a thlen dik thu a sawi a, fan-te hmaah a theihna pholan a chak tawh thu a sawi lang tel bawk.

Masuaku hian France Under 18 leh Under 19 tan khel tawhin kum 22 chauha upa a la ni a, hmabak a nei eng hle. Greece-ah season thum hun a hman chhungin league nomawi pahnih a chawi bakah Greek Cup nomawi vawi khat a chawi hman bawk a ni.