Gold 40 lak a ni tawh

Nimin tlai thleng khan Rio Olympic-ah gold medal 40 sem chhuah a ni tawh. United States leh China chuan gold panga ve ve an la tawh a, silver medal dawng hnem zawk US chu table hmahruaitu an ni rih. Ram hrang hrang 38-in medal an la tawh a, gold bik hi ram 20-in an la tawh thung. Nimin tlai thleng kha chuan India tana medal la an la awm lo a ni.

Brazil tan Silva

Rio Olympic neih mek--ah a thlengtu Brazil chuan hawn a nih aṭanga ni thumnaah gold medal an la ve ta. Rafaela Silva chuan women's 57kg judo-ah Mongolia nula world number 1 Sumiya Dorjsuren a hneh. Silva hi London 2012-ah khan a lo hlawhchhan tawh a, tunah chuan an ramah chawimawiin a awm. Japan tan London-a gold lo dawng tawhtu Kaori Matsumoto chuan European cham-pion vawi nga ni tawh Portugal nula Telma Monteiro hneh-in bronze a la ve bawk.

Russia gold pahnihna

London 2012 silver medallist Yana Egorian chuan hmeichhe chem vai (women's sabre)-ah a hnampuinu Sofiya Velikaya hnehin Russia tan gold medal a la. Kum 22-aupa Egorian hi a tir lamah che ṭha lo zawk mah se 15-14 in hnehna a chang. Ukranian Olga Kharlan chuan France nula Manon Brunet lakah 15-10 a hnehna changin bronze medal a la ve bawk.

Rugby champion Australia

Kuminah a vawi khat nan Olympic-ah Rugby sevens telh a ni a, Australia hmeichhiate chuan New Zealand lakah 24-17 a hnehna changin infiamna chanchinah bung thar an ziak. Bronze medal in-chuh-naah Canada chuan 33-10 in Great Britain an hneh.

US tan Lilly King

United States tan Lil-ly King chuan hmei-chhe tuihleuh (100m breaststroke)-ah gold medal a la. King hian hnehna chang turin minute khat leh second 04.93 hun a hmang. Pahnihna chu kum 2013 a damdawi hman phal loh a hman vanga thla 16 chhung zet an lo hrem tawh Yulia Efimova a ni. Russsian swimmer hian silver la turin minute khat leh 05.50 chhung hun a hmang thung a, pathumna chu US swimmer tho Katie Meili (1:05.69) a ni.

Japan tlangval an mawi

Japan tlangval te chuan Men's Gymnastics-ah point 274.095 hmuin gold an la. Rio Olympic-ah Japan-in pakhatna dinhmun an luah vawi hnihna chiah a ni. Russia chuan point 271.453 hmuin pahnihna an ni a, point 271.122 hmutu China chu pathumna an ni.

Record siamtu

Thailand nula

Thailand nula Su-kanya Srisurat chuan women's 58kg category-ah 240kg chawiin gold medal a la, hei hi world record thar a ni. He inelnaah hian Thailand nula tho Pimsiri Sirikaew chu pahnihna niin Taipei aiawhtu Kuo Hsing-Chun chu pathumna a ni.