India mipa leh hmeichhe hockey team chak lo

Rio Olympic neih mekah India mipa hockey team chuan an match hmasa berah hnehna chang mah se Thawhṭanni khan Germany 2-1 in an hneh lo. Hmeichhe team pawh Great Britain lakah 2-0 in an tlawm.

Champion lai Germany tan hian minute 18-naah Niklas Wellen chuan goal hmahruai khungin Rupinder Pal Singh chuan India tan minute 23-naaah an si phurh a sut. Point khat ve ve an hmu dawna a lan hnuah hun tawp hamrik a rik hma deuh chiahin Christopher Ruhr chuan German chakna goal khungin an ram chu point thum a hlawhchhuah sak.

Pool B-a ram paruk ten match hnih ṭheuh an khel tawh a, point ruk hmu thei Germany chu hmahruaitu niin an hnuaiah hian point li hmu pahnih Netherlands leh Argentina te an awm. India hian point thum hmuin quarterfinal lut thei dinhmunah an la ding ve mek a, an hnuaiah hian Canada leh Ireland te an awm.

Pool A lamah world number 1 Australia chu world number 11 Spain lakah 1-0 in an chak lo. Anni lamah hian Belgium chu hmahruaitu niin Spain, Australia, New Zealand, Great Britain leh Brazil te nen an awmkhawm.

Olympic Hockey Centre-a in-khelah hmeichhe team pawh an che fuh thei rih lo, Giselle Ansley, Nicola White leh Alex Danson te an dan zawh loh avangin 3-0 in an chak lo.

India hmeichhe team hi kum 36 hnua a vawi khat nan Olympic-a an inlan lehna hmasa ber a ni a, an match hmasa berah Japan nen 2-2 a inhnehtawkin point khat an lo hmu tawh.

India hmeichhe team hi 16 an ni a, heng bakah hian stand-by turin mi pahnih an hruai tel a, chung zinga pakhat chu H. Lalruatfeli a ni. Ani hi team-a tel ni ve chiah lo mah se, inhliam an awm chuan midang thlaktu atan koh theih a ni.