Premier League-ah entu awm lawk dawn lo

Covid-19 nghawng chu infiamna khawvelin a la tuar chhunzawm zel a, UK sorkar chuan a hma berah March thla tawp hma chu infiamna te chu a hmuna entu an awm a rem loh tur thu an sawi. 

Thawhlehni khan sorkar chuan infiamna pawl hrang hrang te titi puina a nei a, he hunah hian March hma chu infiamna eng pawh, a hmunah mipuiin an en a rem loh tur thu infiamna pawl hruaitute hi an hrilh a ni. 

Inhmuhkhawmnaah hian football, rugby, cricket, Formula 1 leh horse racing hruaitute an tel a, hetianga thutlukna siam a nih takah chuan Premier League-ah pawh entu an awm lawk dawn lo tihna a ni - club tan chuan channa a tling. 

Premiership Rugby chief executive Darren Childs chuan, "Covid-19 vanga sum lakluh tlem ta, a hmuna fans an neih theih loh avanga sum tam tak chan tawh club-te tan chuan he thutlukna hi channa nasa tak a ni," a ti. 

UK sorkar hian October 1 aṭang chuan a hmuna fan-ten inkhel an en theihna turin ruahmanna a lo siam tawh a, mahse Thawhlehni vek khan Prime Minister Boris Johnson chuan ruahman anga an kaltlang theih loh tur thu hi a lo sawi tawh a ni.