I Day Football 2016 Group A hmahruaitu Chanmari FC Aug 12 zanah Aizawl FC Vs Lajong
Chanmari FC-in AIFF Under 19 hnehin Aizawl FC zuan khumin Group A hmahruaitu an ni a, semifinal-ah Shillong Lajong an pumpelh bawk.
Nimin inkhelah hian Ṭhasiama'n minute 59-naah goal pawimawh a khung a, Venghlui tlangval goal khung hi Chanmari FC chak nan a tawk. Lalsangzuala Hmar hote hian semifinal-ah Zo United emaw Ramhlun North emaw an hmachhawn ang.
Semifinal chu
I Day Football semifinal hi August 12, Zirtawpni hian Lammualah khelh a ni dawn. Tlai dar 2:00-ah Chanmari FC leh Group B pahnihna an inkhel dawn a, Ramhlun North-in vawiina Bethlehem Vengthlang FC an hneh chuan MPL kaithar hi Lalsangzuala Hmar hote hmachhawn tur an ni.
Tun dinhmunah erawh Zo United hi Group B pahnihna an ni a, vawiin tlaia BVT-in point an hlawh chhuah chauhin semifinal an lut thung ang.
Zirtpawni zan dar 7:00-a Lajong leh Aizawl FC inkhel tur hi mipui ngaihven hlawh tur chu a ni. I League-ah Mizo club AFC-in Shillong-a point an hlawhchhuah loh vangin India ram inelna sang ber
aṭangin an relegate a nih kha. K. Malsawmkima hoten Lammual ngeiah an hneh loh Lajong lakah phuba lakna remchang an nei dawn a, inkhel hmuhnawm bik a ni ang.
Lajong-in Dinthar an draw ṭumin defender pawimawh Sandeep Singh-a'n yellow card a hmuh avangin semifinal-ah a inlan ve thei dawn lo. Aizawl FC erawhin Chanmari West an hmachhawn ṭuma hrem tawk Lalruatthara an chhawr thei tawh thung ang.
Lajong coach Thangboi Singto chuan, "Aizawl FC hian I League-a tawnhriat nei player an kawl nual avangin khelhpui an châkawm loh a, tun inelna bikah erawh Chanmari FC hi an la khel ṭha ber chuan ka hria. Chutihrualin duh thlan tur pawh ka hre lo," tiin Vanglaini palai a hrilh.
Tunah chuan Manipur coach Thangboi-a duhthlan vang ni loin Lajong-in I League-a ṭum hnih an khelhpui tawh Aizawl FC an hmachhawn dawn a, Mizo mipui hmuh châk inkhel a ni ngei ang.
Lajong hlau lo Chanmari
Chanmari FC coach Lalsangzuala Hmar chuan, "Shillong Lajong pumpelh turin kan khel lo a, AIFF Under 19 hneh kha kan tum a ni. Result-in a nghawng theih lam kan ngaihtuah lo a, ṭha taka khelh zawng kha ka duh chu a ni," tiin AIFF Under 19 an hneh zawhah a sawi.
Group A match hnuhnung berah hian Chanmari FC-in player pawimawh Malsawmfela leh R. Malsawmtluanga te an chhawr thei lo a, Vanlalbiaa Chhangte leh Ṭhasiama ten khelhna hun ṭha an neih phah.
CFC hian Lajong pumpelh turin chak ngei ngei mamawh mah se goal khat leka hma an hruai chungin coach Sanga'n player enchhin nan a hmang a, Dinthar aṭanga an lakluh Isaac Lalruatpuia leh Under 18 team aṭanga senior team-a sawn luh R. Lalthanmawia te chu khelmualah hmuh an ni. Chanmari boss hi a substitution siam dan aṭangin a thusawi dikna chen a hmuh theih a, tunah erawh final-ah chauh Shillong Lajong hi an hmachhawn thei tawh ang.
Inkhel chu
AIFF Under 19-in an match hnuhnung berah point hlawhchhuah an tum tih a lang a, Chanmari FC-in goal khung an tum bawk avangin inkhel a hmuhnawm nghal hle.
Chanmari FC winger Lalrammawia'n hnai tak aṭangin a pet goal lo a, hemi hnu hian Ṭhasiama'n pet goal mah se offside vangin pawm a ni lo. Ṭhasiama bawk hian a lu hmanga a chance ṭha neih chu a hmang ṭangkai thei lo bawk.
AIFF Under 19 tan Edmund Lalrindika a hmuhnawm a, Lunglei rawlthar hi tlarhma lama a kawppuiten an thlawp ṭha tawk lo.
Mikhual team captain Edmund-a freekick hlawhchhuah chu Ragav Gupta-a'n a hman ṭangkai thei loh bahah Rahim Ali-a ball pet kawh tak chu goal zawnah a kal lo. First half-ah goal a lut lo a, Chanmari FC-in chance ṭha ngah zawk mah se AIFF Under 19 hian si phur zawka awm an phu bik lo.
Second half-ah AIFF Under 19 player-te naupanna langin defender chetsual vangin buai nuaih karah Ṭhasiama'n minute 59-naah goal pawimawh a khung.
Hun tawp lamah Chanmari bet deuh mah se counter attack hmangin an goal nawr a na a, Rammawia thawhrah sengtu Fela Zote ball pet kawh tak chu Mohammed Haroon-a'n ṭha zetin a dan sak. AIFF Under 19 hian an keeper Haroon-a zarah goal khat bak an chhuah lo a, hun tawp hma hretin Rammawia goal khung tur a dan sak leh bawk.
AIFF Under 19 coach Floyd Pinto chuan, "Match tinin hma kan sawn a, Chanmari FC kan hmachhawn meuh chuan kan player-te pawh kan huaisen tawh khawp mai. Kan tan chuan I Day Football hi inzirna ṭha tak a ni," tiin Mizorama an inkhelh vanga a lawm thu Vanglaini palai a hrilh.