Abhinav tan medal a awm lo

India tana Rio Olympic medal dawn beiseina pakhat chu a tawp leh ta. Mipa 10m air rifle inkahsiakah Abhinav Bindra chu palina niin medal a dawng lo chiah.

2008 Beijing Olympic khan Abhinav Bindra hian 10m air rifle-ah India tan gold medal a lo kap chhuak tawh a, kuminah pawh hian beiseina sang tak nen Brazil pan mah se pathumna Croatian sports shooter Gorsa Petar chu point 0.1 chauhin a phak lo!

Olympic Shooting Centre-a inelna neihah 10m air rifle-ah hian point 630.2 hmutu Italy shooter Niccolo Campriani chuan gold medal a dawng a, pahnihna chu Russia aiawhtu Vladimir Mas-lennikov (629.0) a ni.

Kum 33-a upa Abhi-nav tan tun ṭum hi Olympic hnuhnung ber ni tawh tura ngaih a ni. Punjab tlangval hian Rio-ah beisei ang result nei thei lo mah se India infiamna huangah chuan a hming a dai tawh ngai lo ang. Beijing-a hlawhtlinna a chan chiah khan India tan Olympic-a mimal gold medal la thei hmasa ber a ni.