I Day Football 2016 Lajong chelhtu Dinthar an tla

Shillong Lajong FC-in vawi thum an chak zawn hnuah nimin khan Dinthar FC lakah point khat chiah an hlawh chhuak.

2014 I Day Football champion Dinthar FC-in Lajong 1-1 in draw mah se point thum an hlawhchhuah loh avangin semifinal an thleng zo lo.

Thangboi Singto-a'n semi-final an luh chian tawh avangin khelhna hmun chang lote inlanna hun remchang a siam sak a, chutichung chuan goal khung hmasa zawkah an ṭang.

Minute 25-naah Alen Deory freekick kawh tak chu Dinthar keeper Lalrinhlua'n a dang per a, Chhinga Veng tlangval Lalrammuana'n Lajong tan a pet goal chiang hle.

Semifinal lut tura chak mamawh Dinthar FC-in goal chance an ngah a, tawnhriat nei ṭha Samuel-a'n hnai tak
aṭangin ṭum hnih a hlah a, right back Vanneihtluanga'n crossbar a pet per bawk.

Hun tawp lamah Lal-chhuanawma Pautu enkawl Dinthar an vanduai reng lo a, substitute Vanlalnunpuia'n keeper Frolilson Ohkar laka penalty a hlawhchhuah chu captain Samuel-a'n minute 87-naah 'cool' takin a pet goal.

An inhnehtawk hnuah Dinthar aiin Lajong-in goal khungna hun ṭha an nei a, substitute Redeem Tlang-a'n goal bul aṭangin a pet over. Goal dang luh belh loin inkhel a tawp a, I League club Shillong Lajong-in hneh loh an la tawng lo.

Dinthar FC coach Lalchhuan-awma chuan, "Player ṭha ṭhenkhat kan chhawr thei lo a, kan khelh danah ka lungawi. Goal nawr zir kan la mamawh a, MFA Super Cup atan kan inpuahchah ang," tiin Vanglaini palai a hrilh. Caoch LCh-a sawi ang hian MPL season hmasa ber champion hian an player pawimawh pahnih Lalruatpuia leh Lalbiaknia te an chhawr thei lo.

Shillong Lajong coach Thangboi chuan, "Hneh loh kan la tawng lo a, chu chu kan lawmna a ni. Defen-der leh keeper inman tawk loh vangin goal kan chhuah a, chakna chance ṭha kan hlah bawk. Eng pawh chu ni se kan player naupang zawk ten khelhna hun ṭha an nei thei a, a lawmawm hlein ka hria," tiin a sawi.