City defender thar John Stones

Manchester City chuan Everton defender John Stones chu khawvela defender manto ber pahnihna ni turin pound maktaduai 47.5-in an lalut. England international hian Etihad Stadium-ah hian season ruk chhung khel turin contract a ziak.

June, 2014 khan Brazilian defender David Luiz chuan Chelsea aṭangin French club Paris Saint-Germain chu pound maktaduai 50-in a zawm a, Brazil international hi khawvela defender manto ber a la nih chhunzawm zel.

Stones-a'n Everton a chhuahsan tur thu hi club pahnihin an puan hma hauhin hriat a ni tawh! UEFA website chuan Champions League khel tur Manchester City squad an tarlanah John Stones hming hi an dah tel a, City-in an duh aia hmaa an puanzar a ngaih phah ta a ni.

Kum 22-a upa defender chuan, "City hi club hmachhawp thui tak nei, manager ropui tak enkawlna hnuaia awm an ni a, he team tana khelh hlan hi ka nghakhlel tawh a ni. Hmun nghet chan nghal a harsa dawn tih ka hria a, mah se ka theihna sang ber lantira hlawhtlinna tam tak chhar turin he hmun hi ka pan a ni," a ti.

England tana vawi 10 inlan tawh defender hian kum 2010 khan a professional match hmasa ber chu Barnsley tan a khel a, Championship club-ah hian season thum a cham hnuah Everton a zawm. Merseyside club tan hian inelna hrang hrangah match 95 a inlan hman a, season hmasa khan Everton hian Chelsea-in pound maktaduai 40-a an dawrna chu an lo hnar tawh a ni.

Stones hian January 2013-a Everton a zawm khan Liverpool khaw club hian pound maktaduai 3 an seng a, club dangah Stones an hralh a nih chuan Barnsley-in sum an dawn ve theih dan tur contract-ah ziah tel a ni. Barnsley-in an tifuh a, Everton-in Stones an hralh tak avang hian pound maktaduai 7 aṭanga 9 tal chu an dawng ve dawn!

City boss Pep Guardiola chuan, "John hian kan hnenah a theihna tak tak a pholan theih nan puih kan duh a, hma a sawn zel theih nana ṭanpui hi kan tihtur a ni. A khelh dan hi ka duh chi tak a ni a, kan squad-a zawm hun ka nghakhlel tawh hle," tiin a player thar chungchang a sawi.

Manchester City director of football Txiki Begiristain chuan, "City-a John Stones lalut tur hian kan theihtawp kan chhuah a, Europe-a central defender
ṭha ber pawl kan lalutah keini chuan kan ngai a ni," tiin Euro 2016 khelh zawh taka bench-a hun hmangtluan defender chu a dah sang hle.

Kum 22-a upa defender hi Guardiola hnuaia City player lakluh pariatna a ni a, Bayern Munich boss hlui hian Stones hma hian Ilkay Gundogan, Nolito, Leroy Sane, Gabriel Jesus, Marlos Moreno, Aaron Mooy leh Oleksandr Zinchenko te chu Etihad Stadium-ah a lo lawmlut tawh a ni.