Rintea tan kan khel dawn - BVT coach

Bethlehem Vengthlang FC-in thihna avanga an midfielder Lalrinawma Liahna an chân avangin an inkhelh hun sawn a ni a, Vawiin chhun dar 2:00 hian Ramhlun North FC nen group match hnuhnung ber an khel dawn.

Ramhlun North tan semifinal lut turin chak ngei ngei a ngai a, beisei tur nei tawh lo BVT-in Rintea tan an khel thung ang.

Lalruatliana Sailo (Tawia) ho RNFC hian point thum an hlawh zo lo a nih chuan Group B aṭangin Zo United-in pahnihna ni chungin semifnal an lut ang.

BVT hi Lungleia an team-mate Rintea vuinaa an kal hnuin Thawhṭanni zanah Aizawl an rawn thleng a, nimin tlai khan training an nei leh chauh.

BVT coach Lalbiaksanga Colney chuan, "Kan vaiin kan tuar tlang a, kan mittui a hul thei meuh lo. Rin-tea thihna avangin hrehawm kan ti tlang a, tunah chuan kan
ṭhianpa tana theihtawp chhuah hi kan tih theih chu a ni," tiin chak tuma an khelh tur thu a sawi.

Ramhlun North-in match pawimawhah an player ṭangkai C. Ramdinmawia, Van-ram-mawia Ngente leh Lalmal-sawma te in-hliam vangin an chhawr thei dawn lo a, hrem vangin David Lalrinchhana a inlan thei dawn lo bawk.

Heti chung hian Ramhlun North coach Tawia chuan, "Zo United aiin kan dinhmun a ṭha zawk a, semifinal luh leh luh loh hi kan kutah a awm. Ka player-te hi an vaiin ka ring tawk a, tupawh lut se ṭha takin an khel thei ang," a ti.

MPL kaithar hian ṭantu mipui an nei ṭha a, Ramhlun North boss chuan, "Ramhlun North hi veng lian tak an ni a, mipui hi kan chakna hnar an ni. Inkhel pawimawhah hian ṭha takin min rawn ṭawiawm leh ka beisei, Dinthar kan hneh theihna chhan pawh kha anmahni vang a ni," tiin mipui ṭanpuina a au.