Mizoramin bul an ṭan ṭha

North East state-te football inelna Dr T Ao Trophy-ah nimin tlai khan Mizoram chu a vawi khat nan an inlan a, Meghalaya 6-0 in an sawp. Group B inkhel dangah Sikkim-in Assam 1-0 in an hneh. manager T. Vanlalhluna leh coach Lalremtluanga-te enkawl Mizoram hian January 23, tlai dar 4:30-ah Assam an hmachhawn leh ang.

Vawiin hian group A team-te an inlan dawn. Tlai dar 2:00-ah Tripura sawptu Manipur-in point la hmu lo Arunachal Pradesh an hmachhawn dawn a, dar 4:30-ah Nagaland leh Tripura-te an inkhel ang. Indira Gandhi Stadium, Kohima-ah Mizoramin bul an ṭan ṭha, minute 3-na lekah vei lam aṭanga  F. Lalrinpuia cross ball chu Lalchungnunga’n chiang zetin a pet goal. Mizoramin inkhel an thunun a, an goal nawr a nat bawk avangin Meghalaya an talbuai hle.

Zotuitlang rawlthar Chungnunga’n a ball thiamna hmangin Meghalaya tlarhnung an chhaih buai hneh hle. Minute 24-naah Chungnunga’n Meghalaya left back bumin Valpuia tan a siasak a, Republic Veng tlangval hian ṭha takin a pet goal. Minute li hnuah ball pet thiam R. Malsawmtluanga corner pet chu Lalrinchhana Tochhawng-in sang taka zuangin chiang takin a tauh goal. Second half-ah pawh Mizoram bawkin inkhel an thunun a, goal thum dang an khung belh.

Valpuia’n minute 80-naah subsitute David Lalrinmuana siamsak a khung a, minute 85-naah MS Dawngliana’n keeper a bum hnuah a pet goal. Malsawmfela chu hun tawp dawnah chauh luhtir ni mah se tawnhriat nei ṭha striker hian MS-a thawhrah sengin a ke vei lamin minute 90-naah Mizoram goal rukna a khung.