Hnung lam hawi a rem lo - Howe

Newcastle United manager Eddie Howe chuan tun hnaia a naute khelh dan chu lungawi thlak a ti hle, hmalam pana an kal mek laiin tun dinhmunah chuan hnung lam hawi a remchang lo niin a sawi.

Magpies hi inelna hrang hranga an match hnuhnung pariatah an chak vek - Premier League table lamah pawh pangana an ni ta a, an chunga awm Chelsea an phak lohna chu point khat chauh a ni a, match khat leka tlanpel thei dinhmunah an ding.

EPL chauh a ni lo, League Cup semifinal first leg-ah pawh Arsenal 2-0 in an hneh thei a, final lut turin minute 90 chhunga goal khat aia tam chhuah loh a tawk, thlasik khaw vawt karah an boruak a ṭha vet vet hle.

Howe chuan, "Tun ang boruak hi kan tawng ngai lo, player tin mai hi hnehna chan châkin an tuihal vek. Khelmual chhunga lut phak nih tumin inelna ṭha kan chhawp chhuak ṭhin a, chu chuan kan inkhelah pawh rah ṭha a chhuah.

"Kan khingpui turte uluk takin kan zirchiang ṭhin, tute pawh ni se dah san leh dah hniam bik neih a rem lo, kan tih theih sang ber chu a ṭha thei ang bera inbuatsaih zel a ni, hma lam pana kal zel tur kan ni," tiin a sawi.

Newcastle United hian zanin dar 1:00 hian Wolves an mikhual dawn - Wolves hi Premier League table mawngphah lama talbuai lai an ni a, inhamtan an duh a nih chuan chetsual reng a remchang bik lo, tlak hlau an nih avangin hmachhawn an awlsam bik lo ang.