League Cup Liverpool leh Manchester City an inlan dawn

English football-a inelna langsar zinga mi League Cup chu khelh chhunzawm zel a ni a, zanin dar 12:15 hian third round khel turin Liverpool leh Manchester City pawh an inlan dawn. 

Premier League champion Liverpool hian khualmualah Lincoln City an lenchilh dawn a, an hmachhawn tur team hi League One club an nih avangin European football-a team hmuhnawm ber pawl tan huphurhawm a awm lo tura ngaih a ni. 

Manchester City chuan zanin dar 12:15-ah vek third round match an khel dawn bawk a, anni hian Premier League aṭanga tla hlim Bournemouth an mikhual dawn. Liverpool ai chuan City game hi hautak tura ngaih ni mah se chak lo tura dah chi erawh an ni lo. 

Premier League club Aston Villa chu zanina third round khel tur zingah an tel a, nipui transfer-a sum hmang nasa Villa hian zanin dar 11:30-ah Championship club Bristol City an lenchilh ang. 

Stamford Bridge-a Chelsea hneh zo hlim Liverpool-in September 28 zanah Arsenal an mikhual zui dawn a, Premier League season ṭan nan chuan Reds fixture ang neih ve duh hi an tam lo ang. 

Game hautakin Liverpool a la hmuah miau avangin Jurgen Klopp-a'n a player neih ṭhat dan berin bul a ṭan a rinawm lem lo a, senior player James Milner hona hnuaiah Divock Origi, Takumi Minamino, Curtis Jones leh Kostas Tsimikas-te ho inlan tura beisei an ni. 

Kum 24 mi Tsimikas hian Liverpool a zawm hnuah match khelh a la nei lo a, Greece left back hian zaninah khelmual a rawn rap a nih pawhin thil mak a ni lo ang. Liverpool player ṭhang-duang ber pawl Curtis Jones hi kum 19 chauh la ni mah se League Cup hi Klopp-a'n tawnhriat neih tir nan a hman a rinawm a, hliam dam kawr  Xherdan Shaqiri hmel kan hmu thut thei bawk.

Wolves aṭanga Liverpool zawmtu Diogo Jota hi pound maktaduai 45 thlenga a man sang chho thei tur khawpa player manto ni mah se Reds tlarhma pathum thlirin starting XI a chan vat a rinawm lo a, League Cup hi bul ṭan nan a hmang mai thei. 

Kum 23 mi forward hian season hmasa khan Wolves tan inelna hrang hrangah match 48 khelin goal 16 ngawt a khung a, goal khung kawngah harsatna a nei lo tih chu a lang chiang. Japanese forward, Anfield-a tlangnel zir chho mek Minamino nen, a laia Origi dahin an rawn inkawp a rinawm a, Jota khel hi Reds fan-ten hmuh an chak tawh khawp ang.

Liverpool tan Joel Matip leh Alex Oxlade-Chamberlain chu hliam vangin an inlan theih a rinawm loh a, zaninah hian Reds Under 21 lamin match khelh tur an neih bawk avangin academy player lam chu lang lutuk lo tura ngaih a ni bawk. 

Bournemouth boss Jason Tindall-a'n third round-ah Manchester City an hma-chhawn dawn khan an tan fiahna a nih tur thu a sawi a, Etihad Stadium-ah zam bik a tum lo. Hetihlai hian Manchester City hi Thawhṭanni zana Premier League match khel ve chauh an ni a, first team player rual chu an chau ang tih a chiang. City boss Pep Guardiola chuan academy player a chhawr tur thu a sawi. 

Pep chuan, "Bournemouth lakah chuan academy player tam zawk kan chhawr dawn a, Premier League atan kan inkhek khal a ngai a ni," tiin league a ngaih pawimawh ber thu a sawi. Manchester City hian September 27 zanah Leicester City chu league match khel turin an mikhual zui leh dawn a, Pep Guardiola naute tan a awlsam dawn lo. 

Pep-a'n Premier League atan inkhek a duh thu a sawi a, hei hi League Cup-a ngaih pawimawh loh vang ni loin a squad-ah player chhawr theih a neih tam loh vang a ni tel bawk. 

Riyad Mahrez leh Aymeric Laporte ten Covid-19 an kai avangin a hun takah training an zawm thei lo a, Bernardo Silva, Oleksandr Zinchenko, Joao Cancelo, Eric Garcia leh Sergio Aguero te chuan hliam vangin Premier League-a an match hmasa ber kha an khel thei lo. 

Mahrez leh Laporte hi chu an inlan theih tawh mai a rinawm a, mahse Pep hian an pahnihna luhtir erawh a la thlang lo cheu ang - Mahrez hi Wolves lakah bench-ah a awm a, zaninah academy player rual a rawn ho a nih pawhin a mak lo ang. Pep-a ṭawngkam aṭanga tehin zaninah hmel thar hmuh lo inrinlawk a finthlak a, zanin inkhel hi City -in hma hun an neih en leh en loh hriat nan pawh thil ṭha tak a ni.