Bayern tan chetsual a thiang lo

Zanin dar 1:00 hian Bayern Munich-in Allianz Arena-ah Hoffenheim an mikhual dawn. Bundesliga-ah champion lai Bayer Leverkusen an rawn che ṭha chho leh tawh a, nizan inkhel chhiar tel loin Bavarians point li chiahin an pha tawh lo. Hei vang hian Vincent Kompany hote tan chetsual a thiang lo a, Hoffenheim an hneh ngei a ṭul.

Bayern tan Harry Kane a pawimawh a, an match hnuhnung bera Borussia Monchengladbach an hneh ṭumin goal awmchhun a khung. English striker hian match 14 aṭangin goal 15 a khung a, amah hnaih bertu Omar Marmoush aiin goal khatin a khung tam zawk.

Marmoush hian January transfer-ah Manchester City a zawm a nih chuan Kane-a tan top scorer nih a awlsam sawt dawn. Chutihrualin Kane-a tan top scorer nih aiin nomawi chawi a pawimawh a, nomawi chawi reng ṭhin Bayern pawh a champion pui thei loh a nih chuan English striker tan mangchhia a ni dawn.

Mahse, Bayern hian zanin hian damlohna avangin Jamal Musiala chhawr thei lo thei dinhmunah an ding a, German playmaker thlak hi a harsa dawn. Chutihrualin Bayern erawh an duh ang player lalut thei an ni a, Musiala awm lo pawh ni se Hoffenheim hneh thei tur an ni.