Loan-in McAtee a chhuah a rinawm

Manchester City midfielder James McAtee-a'n khelhna hmun a chan tam loh avangin intuai hriam turin loan hmanga a chhuah a rinawm. Kum 22 mi McAtee hian Salford an sawp ṭumin hattrick a siam a, City-ah a dinhmun a chian phah chuang lo.

Pep Guardiola chuan, "James hi kan bulah awm se ka duh. Tun nipuiah pawh khan chhuak lo tura titu chu keimah ka ni a, mahse khelhna hmun a chang tam tlat lo. Thil awm dan kan thlir zel ang," tiin a sawi.

McAtee hian tun season-ah City-in hliam an ngah chungin Premier League match li chauh a la khel a, inelna pumpuiah match 11-ah chauh a la inlan. A khelh zat thlir chuan Pep-a'n a la ring ngam lo a tih theih a, chutihrualin a theihna erawh a sang.

City Academy aṭangin Jadon Sancho, Cole Palmer, Morgan Rogers leh Liam Delap te an chhuak a, tun hnaiah an che ṭha hlawm a, heng player ṭha rual zinga captain armband hreng ṭhin chu McAtee hi a ni. English midfielder hian tun hmain loan hmangin Sheffield United a zawm tawh a, tun ṭumah hian loan hmanga a chhuak leh a nih chuan German club a zawm rin a ni.