Juventus-ah Morata a kir

Atletico Madrid striker Alvaro Morata chu season khat chhung loan-a khel turin Juventus lamah a kir a, a loan hun hi kum khat dang pawhsei theih tur niin Juve hian an duh chuan a nghetin an lalut thei dawn bawk a ni. 

Club pahnih inremna ang tak chuan Morata hian tun season chu Juventus-ah hian loan-in a khel phawt ang a, Italian club hian loan-a an hawh manah Atletico hi pound maktaduai 9.2 an pe ang. Season khat dang loan-a an hawh chhun-zawm duh a nih chuan an hawh leh thei ang a, pound maktaduai 9.2 bawk an pe leh ang - an la nghet law law duh a nih pawhin a ngheta lak theih dan a awm. 

Kum 27 mi striker hi kum khat hnuah a ngheta an lalut a nih chuan pound maktaduai 41-in an lalut ang a, kum hnih hnuah an lei dawn a nih erawh chuan pound maktaduai 32 an pe thung ang. Spain tan vawi 33 inlana goal 17 khung thei striker hian Chelsea aṭangin Atletico hi kum 2019 khan thla 18 chhung atan loan-in a zawm ve chauh a, July khan pound maktaduai 58-in a nghetin contract a ziak ve chauh! Mahse, a contract ziah thar kumah Real Madrid striker hlui Morata a chhuak leh nghal a, Juve tan hian 2014-2016 inkar kha a lo khelh tawh avangin Turin khawpuiah a mikhual dawn lo.