Denver Nuggets hun a thleng ve ta

NBA Western Conference Finals inkhel kal laiah Los Angeles Lakers an chefuh hmasa a, tunah chuan Denver Nuggets hun a thleng ve ta. Nuggets hian nimin zing game 3 inkhelah 114-106 in hnehna an chang.

Game hmasa pahnih latu Lakers lamin best-of-seven series-ah chuan 2-1 in hma an hruai. September 25, Zirtawpni hian game 4 an khel ang, tlang tur chuan game 4 tal lak a ngai. A chak zawk chuan NBA Finals-ah Miami Heat leh Boston Celtics inkhela chak zawk an hmachhawn dawn.

Tukin hian Eastern Confe-rence finals-ah Miami Heat leh Boston Celtics ten game 4 an khel, an inkhelh tawh chinah Heat hian series-ah 2-1 in hma an hruai mek a ni.

Playoff-ah Lakers hian an match hnuhnung parukah hnehna an chang vek a, game 3-ah pawh hian rinkai zawk an ni. Mahse, LeBron James-a'n 30 points, 10 rebounds leh 11 assists a nei chungin a team a chakpui zo ta lo.

Quarter hmasa pahnumah Lakers hi an hniam zawk vek, quarter hnuhnung ber bikah 31-21 in sang zawk mah se an dinhmun siamṭhat nan a tawk zo chuang lo. Game 2-ah pawh hun tawp dawna Anthony Davis-a 3-point neih hmanga chak hram an nih avangin inenfiah an ngai.

Lakers coach Frank Vogel chuan, "Denver khan tharum an hmang nasa, inkhelh chhung zawng khan chau miah loin an tharum an hmang ni berin ka hria," a ti. James chuan holam taka ball an hloh ṭin chu an tuar tih a sawi ve bawk.

Hun tawp dawn lamah Lakers hi 99-96 in an hnaih hman. Amaherawhchu a zawnin 3-point neih tuma an vawm pali ngawt an hlah a, an tihsual chiah hian Nuggets lamin hrem let chat zelin James leh a ṭhiante an chak zo lo a ni.

Nuggets tan Murray 

Game 2-a an chak loh dan kha Denver Nuggets tan a uiawm a, game 3-ah chuan an chesual nawn duh tawh lo. Point 28 leh assists 12 neitu Jamal Murray chu an chakna hnar a ni a, ani bakah hian Jerami Grant-a'n playoff a khelh chian a point neih hnem ber (26 points) a tawng bawk.

Nuggets coach Michael Malone chuan, "3-0 in hniam ni ila chuan thawh leh a harsa tawh khawp ang, game kan lak tak avangin beiseina a sang thar. Ka naute hi an beidawng ve ngai lo a, kan thil duh leh tuma kan chian avangin kan bei ngar ngar ang," tiin an la tlawm loh thu a sawi.

Nidang zawng aiin Nuggets hian Lakers aiin 3-points an nei thei (33-18 ) zawk a, free throw an hman ṭhat zawk (23-14) bawk avangin dinhmun duhawmah an ding. Game 4-ah pawh an boruak ṭha ang hi neih chhunzawm an tum ang.

Jamal Murray chuan, "Thawhhona ṭhain rah ṭha a chhuah thei tih chu a lang leh ta. Kan khingpui team-ah khan player langsar leh ropui awm mah se kan team chuan kan hneh thei a ni tih kan hriat nawn a pawimawh," a ti.