ISL club an bazar zel

Indian Super League khelh hun a hnai a, ISL club-te pawh transfer bazar-ah an chet nat chhunzawm zel. ATK Mohun Bagan chuan foreign player pasarih an neih theih chu an nei kim ta a, A League club Brisbane Roar aṭangin midfielder Brad Inman an lalut - a man zat erawh puanzar a ni lo.

Kum 28 mi midfielder hi Newcastle United youth system chhuak a ni a, season hmasa khan Roar tan inelna hrang hrangah match 26 khelin goal nga a khung a, assist vawi ruk a nei bawk. Scotland tana age level-a inlan tawh, Australia senior team-a koh nichunga la inlan lo Inman hian English club tenau Crewe Alexandra, Peterborough United leh Rochdale tana lo khel tawhin League One-ah a lo inlan tawh ṭhin a, tawnhriat a nei ṭha hle. 

Mohun Bagan nena inzawm thar ATK hian David Williams (Australia), Roy Krishna (Fiji), Carl McHugh (Ireland), Edu Garcia, Javi Hernandez & Tiri (Spain vek) an neih tawh avangin foreign player dang chu an lalut thei tawh lo ang. 

Team indinthar tum mek Chennaiyin chuan Bosnian defender Enes Sipovic an lalut bawk a, kum 30 mi defender hian Qatar Stars League club  Umm Salal SC aṭangin Chennai club hi free transfer-in a zawm. Feet ruk leh inches ruk zeta sang centre back hian Romania, Belgium, Morocco leh Saudi Arabia-ah te pawh club hrang hrang tan a lo khel tawh a, India leilunga insiamrem turin hun a mamawh tam lo ang. 

Tun transfer-a che na ber pawl Hyderabad pawhin player thar an nei leh tawh a, Spanish striker Francisco Sandaza chu Segunda division club Alcorcon aṭangin an lalut. Kum 35 mi striker hian Brighton & Hove Albion, Rangers leh Girona tan pawh a lo khel tawh a, Asia lamah pawh Japanese club FC Tokyo, Qatari club Al Ahli leh Chinese Super League club Qingdao Huanghai tan lo khel tawhin India ramah inthlahrung 

lo ang