Bangladesh hmaah India an mualpho

Cricket atchilhna ram India cricket team-in an zinchhuahna ramah Bangladesh an ngam lo a, cricket ram ropuia inchhal India chu Bangladesh hmaah run 79-in an tlawm.

India leh Bangladesh te hian ODI series match thum an khel dawn a, he series-a chak zawk ni turin India tan match khelh leh tur pahnihah chak loh a thiang tawh lo.

Indian bowler-te ngamtu Bangladesh

Mirpur khawpuia inkhelah Bangladesh an bat hmasa zawk a, anmahni ramah India bowler-te an ngam hle.

Bangladesh tan Tamim Iqbal chuan ball 62 a hmachhawnah run 60 a vawchhuak a, ball 40-a run 54 vawchhuaktu Soumya Sarkar-a'n a thlawp ṭha viau. Over 49.4-ah Bangladesh-in run 307 vawchhuakin an vaiin an out a, India tan target um tham tak tur an tuk sak.

Bangladesh target siam zat hi tam tham viau mah se batsman nei ṭha India tan bowler nei ṭha lo Bangladesh laka heti zat target um hi thil huphurhawm a ni lo.

Lal thar 'Mustafizur' a piang

India beisei angin inkhel a kal lo a, khawvela batting line-up nei ṭha ber pawl India-in a la hmuh ngai loh Bangladeshi bowler a hmu. Kum 19 leka upa fast bowler Mustafizur Rahman-a'n Bangladesh tana a match hmasa berah wicket nga lain run 50 chiah a pe a, India batsman-te a barakhaih.

Rohit Sharma chu India tana run siam hnem ber niin ball 68 a hmachhawnah run 63 a vawchhuak a, amah thlawp zotu midang an awm lo. Over 46-ah India-in run 228 an tlin hram a, ODI match hmasa berah Bangladesh lakah an mualpho.

Eng nge an sawi?

India captain Mahendra Singh Dhoni chuan, "Kan chak loh vangin kan hnual a, chutihrualin keini aiin Bangladesh an khel ṭha zawk hrim hrim a ni. Inkhel ṭan tir aṭangin Bangladesh batsman-te khan kan bowler-te an ngam em em a, dik taka sawi chuan ruah sur vang khan inkhel kha chawl zawk lo phei ila chu run 330 vel an vawchhuakin ka ring a ni," tiin Bangladesh batsman-te a fak hle.

Bangladesh captain Mashrafe Mortaza chuan Bangladesh tana a match hmasa bera khel ṭha em em mai Mustafizur a fak a , "Kha bak kha beisei tur a awm chuang lo. Mustafizur hian batsman ho tibuai turin theihna a nei tih kan hriat avangin a che ṭha pawh hi mak kan ti hran lo. Kan opener pahnih Tamim leh Soumya te khelh ṭhat zar kan zo bawk a ni," a ti.

Man of the match-a thlan Mustafizur chuan, "Ka game hmasa bera khelh ṭhat hi ka duh a, an game hmasa bera wicket nga la thei hi an tam lo tih hre mah ila ka tana pawimawh ber erawh India hneh hi a ni," tiin mimal chet ṭhatna ai chuan team a dah pawimawh zawk thu a sawi.