Mexico lamah Gignac

France international striker Andre-Pierre Gignac chuan amah duhtu Europe club ṭhenkhat barakhaihin Mexico rama Liga MX club Tigres UANL a zawm dawn.

Season hman zawh taka French Ligue 1 a goal khung hnem ber dawttu striker hian a club khelh mekna Olympique Marseille-a a contract neihlai a hmang zo tawh a, free-transfer in Tigres hi a pan thei dawn a ni.

Kum 29-a upa French striker hian kum khatah dollar maktaduai 4 a hlawh dawn a, Mexico-a footballer hlawh hnem ber a ni ang.

France tana vawi 19 lai inlan ve tawh Gignac hi West Ham, Newcastle United, West Brom leh Dynamo Moscow te pawn an rim a, Mexico lam pan hi a thlang ta zawk a ni.