Euro U21 Best Player chhui zuina Naupang ṭhate kha an hlawhtling zui zel em?

July 1, 2015 - zing dar 5:30 (IST) a rik hunah chuan Liverpool-in official-in James Milner leh Danny Ings an ziak lut thei tawh ang a, chutiang bawkin Manchester United-in official-in Memphis Depay an player ni turin annemnghet thei tawh ang. Transfer boruak a ngaihnawm lehzual ang a, jersey nena 'player an phochhuah hma chu awih loh tur' an tih hun kha a thleng zui ang. September 1, 2015 - zan dar 11:30 a rik hun thleng club tinin player lakna hun an nei a, hun neih zat inang mah se club pawisa neih zat a inang lo, scout neih ṭhat a pawimawh.

Europe club lianten 2015 UEFA European Under-21 Championship an ngaihthah dawn lo. Luis Figo, Fabio Cannavaro leh Andrea Pirlo ten he inelnaah hian Golden Ball an dawng tawh a, an ropui zui bawk. Chutihrualin lar zui lote pawh an awm ve tho a, Euro U21-a best player atana thlan hmasak ber Vahid Halihodzic aṭanga Golden Ball dawng hnuhnung ber Thiago Alcantara thlengin chhui zuina han nei teh ang.

1978 – VALID HALILHODZIC (Yugoslavia)

Inelna ṭan kum khan kum 21 aia upa player pahnih tel theih a ni a, Vahid Halilhodzic hian Golden Ball a dawn khan kum 26-a upa a ni tawh. Yugoslavia forward hi champion-na kawngah player pawimawh ni mah se footballer hlawhtlinga chhiar tur a ni lo. Ram tan senior team-ah vawi 15 chiah a inlan. Amaherawhchu Halihodzic hi coach chhuanawm tak a ni a, tunah hian Japan enkawl mekin 2014 FIFA World Cup-a Algeria coach kha a ni.

1980 – ANATOLIY DEMYANENKO (USSR)

Soviet Union defender Anatoliy Demyanen­ko hian Under 21 Championship-ah an ram hi match rukah goal khat chiah chhuahin a champion pui a, defender ṭha tak a ni. Ram tan vawi 80 zet a khel a, USSR tan World Cup ṭum thum (1982, 1986 leh 1990) a khel. Ukranian player of the 20th century-ah pathumna a ni a, Andriy Shevchenko leh Oleg Blokhin te chiah a tluk lo.

1982 – RUDI VOLLER (WEST GERMANY)

1990 FIFA World Cup thlir a, tape recorder aṭanga 'To Be No. 1' ngaithla hman tan chuan Rudi Voller-a ṭhatzia sawi nawn a ngai tawh lo. German forward hian 1982 Euro U21 semifinal leh final-ah goal khung mah se England hneh loin champion nomawi an chawi lo a, best player-ah erawh thlan a ni tho.

Voller hian 1990 World Cup-ah Germany a champion pui a, German legend Lothar Matthaus leh Jurgen Klinsmann te nen Serie A-ah Inter Milan an champion pui bawk.

1984 – MARK HATELEY (ENGLAND)

England centre forward Attila hming lem an vuah Mark Hateley hian 1982 Euro U21 khan knockout stage-ah goal ruk khungin England a zawnin a champion pui a, football career duhawm tak a hmang zui bawk.

Attila hian Golden Ball a dawn zarah Portsmouth aṭangin AC Milan-a zawm a, hemi hnu hian Monaco, QPR leh Scottish club Rangers tan a khel leh a, Scotland-ah nomawi ṭhahnem tak a chawi. England tan ṭum 32 khelin goal kua a khung nghe nghe.

1986 – MANUEL SANCHIS (SPAIN)

Central defender Manuel Sanchis kaihhruai­na hnuaiah Spain-in Roberto Mancini leh Gianluca Vialli te telna Italy an dang chat a, penalty hmangin an champion. Sanchis hian Real Madrid tan chauh khelin Spanish club lian hi La Liga-ah vawi riat a champion pui a, 1998 Champions League-a a captain-na hnuaiah an champion a, 2000-a an champion khan substitute aṭangin a lut bawk. Spain tan vawi 48 zet a khel a, ram tan nomawi lian tham a chawi zui lo.

1988 – LAURENT BLANC (FRANCE)

France-in 1998 Euro U21 final-ah Greece 3-0 in an hneh a, Manchester United legend Eric Cantona tel mah se defender fing Laurent Blanc chu best player a thlan a ni. Blanc hian kum 10 hnuah France chu an ram ngeiah FIFA World Cup nomawi a chawi pui a, club lamah pawh a hlawtling hle. Football khelh a chawlhsan hnuin team enkawl hna a ṭan a, manager hlawhtling tak niin France manager ni lai a ni.

1990 – DAVOR SUKER (YUGOSLAVIA)

Yougoslavia-in final-ah Soviet Union hneh lo mah se inelnaa goal sarih khungtu Davor Suker thiamna hmuh hmaih a ni lo - best player-a thlan a ni. 1998 World Cup-ah Croatia tana inlanin top scorer a nih vangin Golden Boot a dawng. Real Madrid tana khelh laiin Champions League a chawi a, tunah chuan Croatia FA president a ni mek.

1992 – RENATO BUSO (ITALY)

A vawi khatna atan Italy chu 1992 khan an champion a, semifinal leh final-a goal khungtu best player atana thlan Renato Buso erawh a lar zui hran lo. Buso hi Italy senior team-a khel turin koh a ni lo a, Italian club pakua tan khelin club pakhatah kum li aia rei awmna a nei lo.

1994 – LUIS FIGO (PORTUGAL)

Portugal-in 1994 final-ah Italy 1-0 in an hneh lo a, chutichung chuan Portugal team hi an ram golden generation hming lem an vuah. Best player-a thlan Luis Figo hi Barcelona leh Real Madrid tana khel kawp thei player a ni a, a hunlai chauh ni lo, football history-a player

ṭha zingah chhiar tel a ni.

Portugal player ropui hian kumin kum tawpa FIFA inthlan ṭhat hunah Sepp Blatter thlak tumin president inchuhnaah a tel rin a ni.

1996 – FABIO CANNAVARO (ITALY)

Italy tlar hmaah Francesco Totti te an awm a, defender ṭha Fabio Cannavaro hna chu Spain forward Raul dah ṭhat a ni. Italy-in final-ah Spain an hneh a, Cannavaro hi best player-a thlan a ni.

2006 FIFA World Cup champion team-ah Italy player pawimawh a ni a, club lamah Juventus leh Real Madrid tan hlawhtling takin a khel bawk.

1998 – FRANESC ARNAU (SPAIN)

Spain champion-na kawngah Barcelona keeper Franesc Arnau-a'n goal khatmah a chhuah lo a, best player-ah thlan ni mah se Arnau hi Catalan club tan first keeper a ni thei lo a, Malaga a zawm hmain vawi 24 chiah a khel. Kum 2011 khan football khelh a chawlhsan a, Spain-ah Iker Casillas-a hunlai a tawn fuh avangin senior team-ah vawi khatmah a inlan lo.

2000 – ANDREA PIRLO (ITALY)

Kum 15 liamta khan kum 21-a upa Andrea Pirlo chuan Euro U21 final-ah goal khungin Italy chu vawi lina atan a champion pui. Italian midfielder ball pet thiam hi tun thlengin a la chuai lo. Season hman zawh takah Pirlo hian Juventus chu Serie A leh Coppa Italia title a lak pui a, Champions League final a thlen pui bawk.

2002 – PETR CECH (CZECH REPUBLIC)

Chelsea chhuahsan mai tur keeper ṭha Petr Cech hian kum 2002 khan Euro U21-ah Czech Republic a champion pui a, final-ah France nen hun pangngaia an inhnehtawk hnuin penalty shootout-ah 3-1 in an hneh. Best Player-a thlan a nih hnuin Rennes a zawm a, French club tan kum hnih a khelh hnuah Chelsea zawmin champion theih tawhna phawt chu a hlah lo.

2004 – ALBERTO GILARDINO (ITALY)

Italy-in Euro U21 ṭum nga an champion-na kawngah an striker Alberto Gilardinho chu top scorer a ni a, best player-a thlan a ni bawk. Gilardinho hian thawm lian tak nei mah se player hlawhtling tak a ni lo. 2006 World Cup champion squad-ah a tel nachungin final a khel lo a, Champions League final-a AC Milan-in Liverpool an hneh ṭumin minute hnih chiah a khel bawk. China club tana a khelh hnuin season liam ta khan Fiorentina tan a khel.

2006 – KLAAS-JAN HUNTELAAR (HOLLAND)

Netherlands a vawi khatna atan an champion a, goal li khungtu Klass Jan Hunte­laar chu top scorer leh best player a ni. Dutch forward hian AC Milan leh Real Madrid tan a khel tawh a, tunhnai kum nga chhung khan German club Schalke tan khelin club history-ah amah aia khungtu tam chu Klaus Fischer chiah a awm. Nipui transfer-ah hian Premier League club nena sawi zawm a ni.

2007 – ROYSTON DRENTHE (HOLLAND)

Kum zawnin inelna neih a ni a, Netherlands an champion zawn bawk. Champion-na kawnga player pawimawh Royston Drenthe chu best player a ni a, Real Madrid-in an la nghal. Star rual zingah Drenthe-a'n Spain-ah a theihna a hmang chhuak lo a, Everton a zawm hnuah kum 2012 khan FA Cup semifinal-a Liverpool an tum ṭumin David Moyes-a squad-ah a tel lo bawk. Tunah hian Championship club Reading tan a khel mek.

2009 – MARCUS BERG (SWEDEN)

Germany an champion ṭum hian Manuel Neuer, Matts Hummels leh Mesut Ozil te an khel nachungin Sweden tana goal sarih khungtu Marcus Berg chu best player a thlan a ni. Berg hian Hamburg zawmin match 43-ah goal nga chiah a khung a, tunah hian Greek club Panathanaikos tan a khel mek.

2011 – JUAN MATA (SPAIN)

Spain champion puitu Juan Mata hi Euro U21-a best player-a thlan a nih hma hian 2010 World Cup champion team squad-ah a tel tawh. Spanish midfielder ball thiam hian tak hian Champions League leh Europa League-a Chelsea a champion pui hnuah kum 2014 January thla khan Manchester United a zawm.

2013 – THIAGO ALCANTARA (SPAIN)

Thiago Alcantara hattrick hmangin Spain-in final-ah Italy an hneh a, player talent nei ṭha tak ni mah se Barcelona player hlui hi inhliam vangin Bayern Munich tan a khel tam lo.

2014 - ?

Kuminah player langsar tak tak inelnaah hian an tel a, Golden Ball dawng pha chin player chu transfer hun lai a ni bawk a, an man a to sawt ang.