Formula 1 Austrian Grand Prix an tlan dawn
Pathianni khian Austria chuan a vawi 28 nan Spielberg’s circuit-ah world championship a thleng leh dawn ta. Tun season-a Formula 1 intlansiak vawi riatna tur chiah a ni ang.
Kum 1964 aṭanga neih ṭan Austrian Grand Prix-ah hian driver hrang hrang 21-in hnehna an lo chang tawh a, heng zingah hian khawtual tlangval pakhat tel veiin Niki Lauda-a'n kum 1984 khan hnehna a lo chang ve tawh.
Spielberg tlankawng hi km 4.326 a sei niin lap 71 an tlan ṭhin. Khawvela Formula 1 intlansiak tlankawngah chuan a a tawi pathumna a ni a, Monaco leh Brazil chiah he tlankawng aia tawi a awm.
Tute nge langsar tur?
Mercedes
Tun season intlansiak pariat awm tawh aṭanga vawi sarih hnehna chang thei Mercedes team hi a langsar leh ngaihven hlawh ber tur an ni ang.
Monaco-ah Lewis Hamilton hi pitstop an hmansual tir avangin pakhatna ni lo mah se intlansiak hnuhung ber Canada-ah erawh pakhatna a ni leh chiang hle. Hamilton hian Austria-ah hnehna a la chan ngai loh avangin Pathianni hi British driver tan a pawimawh lehzual hle.
Hamilton-a teammate Nico Rosberg hi champion lai a nih avangin a chungah mipui mit a fu lo thei lo. Tun hmain Austria leilungah Mercedes hian hnehna an la chang ngai lo a, nikum kha hnehna an channa hmasa ber a ni nghe nghe.
Ferrari
Tun season-a Mercedes hnaih thei ber chu Ferrari an ni. Anni hian world champion vawi li ni thei Sebastian Vettel leh Kimi Raikkonen an nei.
Tun season-ah Vettel hi Mercedes driver ni lo hnehna chang thei awmchhun a ni a, Malaysia Grand Prix-ah pakhatna a ni. Beisei angin Ferrari che ṭha tawk rih lo mah se he team hian chak turin theihna an nei tih chu Vettel-a'n a lo pholang tawh.
McLaren
McLaren driver pahnih Fernando Alonso leh Jenson Button te hian tun season-ah beisei pha lo hle. Amaherhawhchu an intlansiakna tur Austria hi tun hmaa McLaren lo chet ṭhat tawhna ṭhin a nih vangin ngaihthah theih an ni bik lo.
Team construction-ah McLaren hi vawi ruk chak tawhin anni aia hnehna chang tam an la awm lo. Brtish driver Button hian tun season-ah point li hmu tawhin Spanish driver Alonso erawhin point khat mah a la hmu lo thung.