Season bul ṭan ṭhat beiseitu Welbeck

Arsenal forward Danny Welbeck chuan season tharah ṭha zawkin bul an ṭan theih a beisei a, champion tura an ṭhat tawk thu a sawi tel bawk.

England international Welbeck hian kum 2014 khan Manchester United aṭangin London club Arsenal a zawm a, Premier League match 25-ah goal li a khung.

Welbeck hian hun pawimawhah Gunners tan a inlan thei lo, FA Cup final-a Aston Villa an hneh ṭumin inhliam vangin a inlan thei lo a, England-in Republic of Ireland leh Slovenia an hmachhawn ṭumin a tel thei lo bawk.

FA Cup final a khelh loh chung chang sawiin Welbeck chuan, "A nihna takah chuan FA Cup final ka khel thei lo kha hreawm ka ti hle. Mahse ka ṭhianten hnehna an chan avangin ka hlim em em tho. Kan champion chiah khan ka rilruah Premier League-a champion turin kan ṭha tawk tih a rawn lang. Keimah bikah chuan hmasawnna tur ka la ngah em em a, kan manager Arsene Wenger hian nitin zir tur min pe zel," tiin a sawi.

Season thar thlir letin Welbeck chuan, "Season hmasa khan a bul kan ṭan ṭhat loh avangin a tawpah kan buai. Season tawp lama kan khelh dan leh season tir kha chu inthlak tak a ni. A bul kan ṭan ṭhat phawt chuan a tawpah a chung berah kan awm thei ang," tiin a sawi.