FIFA buaina Belgium-in FIFA lakah pawisa phut tum

Tunhnaia FIFA buai­nain ziaawm lam aiin zual lam a pan zel a, World Cup 2018 thlen diltu zinga mi Belgium chuan Swiss Court-in a chhuina anga World Cup thlengtu thlannaah dik lo a awm a nih chuan World Cup campaign nana an sum sen an phut let tur thu an sawi.

Swiss court chuan World Cup 2018 leh 2022 thlengtu tur thlannaah thil dik lo a awm ngei nia ngaiin an chhui chiang mek a ni.

Belgian Football Federation chairman Fran­cois de Keersmaecker chuan, "Tuna an puhna ang hian FIFA hian tih dik loh a lo nei ngei a nih chuan kan sum sen tawh zawng zawngte kha zângnadawmna anga min pe let leh turin kan phut dawn a ni," a ti.

Netherlands nena 2018 World Cup inthlen ṭawm diltu Belgium hian campaign nan pound maktaduai 3.2 ngawt an seng a, Netherlands nena an sen belhkhawm phei chu pound maktaduai 6.5 lai a ni.

World Cup 2018 thleng tur hian Russia chuan vote 24 awmah vote 13 an hmu a, Spain-Portugal in vote sarih, Netherlands-Belgium leh England te'n vote hnih ve ve an hmu a ni.