Copa America Argentina leh Brazil an chungnung bik lo

South America football powerhouse Brazil-in FIFA World Cup ṭum nga an chawi tawh a, Argentina leh Uruguay te ṭum hnih ve ve an champion tawh bawk. Amaherawhchu Neymar, Lionel Messi leh Luis Suarez te ram hi 2015 Copa America-ah an chungnung bik lo a; Colombia, Paraguay leh Chile ten an elphak ve tlat avangin South America-a football thiam ber ram zawnna hian ngaihven a hlawh phah hle.

Copa America-ah ram 12 ten vawi hnih ṭheuh an khel tawh a, point ruk hmu thei an awm lo. Ecuador leh Jamaica ten chak an la nei lo a, stage sang zawk thleng turin beiseina an la nei ve ve.

Chile leh Vidal

Inelna thlengtu Chile thiam­puipa Arturo Vidal-a'n goal thum a khung tawh a, Juventus midfielder hian a goal khung aiin car hmanga a chetsual a lar pui zawk.

Arsenal midfielder Alexis Sanchez chuan, "Vidal hian a thil tihsual hi a theihngilh a, ṭha taka a khelh chhunzawm a ṭul. Inthununna a nei tawk tih chu a chiang a, insawithiamna tur kan nei lo. Kan team hi chhungkua kan ni a, Vidal puih hi kan inhuam. Tunah chuan a ṭha lo lam sawi bansan ila, Copa America chauh ngaihtuah tawh ang u," tiin a sawi.

Chile hi Group A hma­hruaitu an ni a, anni ang bawka point li hmu Bolivia nen tukin zing khan group match hnuhnung berah an inhmachhawn.

Messi telna Argentina

Argentina captain Lionel Mes­si-a'n an match hmasa ber­ah Paraguay lamah goal khung nghal mah se an goal hnih khung an humhim zawh loh avangin 2-2 in an inhnehtawk. Argentina-in match hnihnaah Sergio Aguero goal hmangin Uruguay 1-0 in an hneh a, point li hmuin Group B hmahruaitu an ni.

Gerardo Martino hoten an match hnuhnung berah point la hmu lo Jamaica an hmachhawn dawn a, an draw pawhin quarterfinal an lut ang. Barcelona treble champion puitu Messi-a'n goal khat chiah khung mah se ṭum hnih man of the match-ah thlan a ni a, Paraguay nen an inkhelh ṭumin lawmman a la duh lo.

Ram leh club tana Messi khelhpui Javier Mascherano chuan, "Messi hi chuan man of the match dawn hi ngaiah a nei tawh. South America rama inelna chu Europe ang a ni lo a, referee-te'n foul an ham mai mai loh avangin Messi tan pawh hian a har khawp ang," tiin a sawi.

Mascherano chuan, "Vene­zuela-in Colombia an hneh a, Paraguay kan draw. South Ame­rica rama inelna chu a awlsam lo a, hei hi World Cup qualifier kan khelh lai aṭangin kan hre tawh. Rilru fim taka kan khelh theih reng a pawimawh," tiin team awlsam an awm loh thu a sawi.

Group B-ah champion lai Uruguay-in point thum chiah an la hmuh avangin quarterfinal lut turin Paraguay hneh ngei an mamawh a, hrem vanga Barca star Luis Suarez an chhawr theih loh avangin a harsa khawp ang.

Neymar tel loin

Nimin zing khan Peru-in Bayern Munich-a contract hmang zo Claudio Pizarro goal hmangin Venezuela an hneh. Group C ram pali Brazil, Peru, Venezuela leh Colombia ten point thum ṭheuh an hmu tawh a, group match hnuhnung ber khelh hmain dinhmun ṭha bik an awm lo.

Brazil captain Neymar chu Colombia an hneh loh ṭumin hnawhchhuah a ni a, Venezuela an khelh ṭumin a tel thei dawn lo. Zirtawpnia thutlukna awm dan a zirin Barcelona star hi quarterfinal thleng hrem a ni thei bawk.

Brazil legend Ronaldo chuan, "Sawifiah tum ngial mah se Neymar thil tih hi a dik lo. Hun harsa tak a tawng nachungin Brazil jersey nen chuan a tih loh tawp tur a ti a ni," tiin Neymar a sawisel.

Neymar a khelh theih tak loah chuan Manchester United nena sawi zawm Roberto Firmino-a'n a thiamna pholan theihna hun ṭha a nei leh thei ang.

Colombia-in Peru an khelh hunah Brazil laka red card hmu Carlos Bacca an chhawr thei dawn lo. Bacca awm lo mah se Jose Pekerman-a'n tlar hmaah James Rodriguez, Radamel Falcao leh Juan Cuadrado te a la neih tho avangin quarterfinal an thleng lo a nih chuan dem a hlawh khawp ang.