Dean Henderson-a'n goal a chhuah lo Luton Town 0 - 3 Manchester United

League Cup third round chu Thawhlehni zan khan khelh ṭan a ni a, Manchester United-in Championship club Luton Town 3-0 in an hneh. Kenilworth Road-a inkhelah Man United tan Juan Mata-a'n minute 44-naah goal hmahruai a khung a, hun tawp dawn hnaihah substitute pahnih Marcus Rashford leh Mason Greenwood ten goal khat ve ve an khung. 

English keeper Dean Henderson chu a inzirchhuahna club Manchester United tan a vawi khat nan a inlan a, goal a chhuah loh bakah save ṭha bik a nei bawk. Henderson-a khelh dan thlirin Spanish keeper David de Gea tan Old Trafford-a 'number 1 keeper' nih reng a harsa dawn.

Ole Gunnar Solskjaer-a'n Crystal Palace laka mualpho player 11 zingah captain Harry Maguire chiah bul a ṭan nawntir a, player dang zawng a thlak vek. Chutihrulain Norwegian manager hian a player-te hi a hrem tihna a ni chiah lo a, League Cup inelna hniam vang leh an khingpui vanga insiksawiah a ngaih theih zawk.

United bul ṭantu zingah player thar Donny Van de Beek, Aaron Wan Bissaka leh Nemanja Matic te an tel a, anni erawh an khingpui tur zinga first eleven chang thei reng an ni thung. Solskjaer hian mamawh huna chhawr theih turin Rashford, Greenwood leh Bruno Fernandes te bench-ah a dah bawk.

Crystal Palace lakah Manchester United khel an a nung tawk lo a, Luton Town hmaah pawh hmasawnna hmuh tur a awm chuang lo. First half tawp hma deuhin Luton defender George Moncur-a'n box chhungah ṭul lo takin Brandon Williams a ti tlu a, minute 44-naah Juan Mata-a'n penalty aṭangin goal hmahruai a khung.

United-in goal hnihna an khung theih mai loh avangin talbuai thei dinhmunah an ding. Second half-ah Luton defender Tom Lockyer-a'n six yard box aṭangin ṭha zetin a pet a, United keeper Henderson-a'n a kut khing khatin a dang. 

Minute 90 chhunga chak zawk an awm loh chuan penalty hmanga chak zawk zawn tur a ni a, Solskjaer-a'n hun tawp lama hlauthawng taka awm duh loin minute 78-naah Greenwood, Rashford leh Fernandes a luhtir. Championship club Luton tan tha thara lut United substitute-te chelh an harsa a, Rashford-a'n minute 88-naah Greenwood-a siamsak ṭha takin a khung a, injury time-ah Fernandes-a pass chu Greenwood-a'n goal-ah a chantir ve bawk.

Ole Gunnar Solskjaer-a'n Manchester United vawi 50 a chakpui a, half century thleng turin match 92 a mamawh. Norwegian manager hian Red Devils manager zingah Ernest Mangnall (match 78) leh Jose Mourinho (match  81) te chiah vawi 50 chak tling tura match mamawh tlemah a tluk lo.

United boss Solskjaer chuan, "Mamawh huna save hi keeper hna a ni a, kum tam tak chhung David de Gea pawhin a ti tawh a ni a, Dean Henderson pawhin a rawn ti ve chiah," tiin a keeper a fak. Henderson hian season liam ta khan Sheffield United-ah loan hmanga khelin league match 36-ah a inlan a, vawi 13 clean sheet a nei.

English keeper Henderson chuan, "Ka club hmangaih tana khelh hi ka duhthusam a ni a, a thleng thei ta hi ka lawm hle a ni. Ka clean sheet bakah kan chak a, chu chuan a nawmna a belhchhah hle," tiin a sawi. United hian Preston North End leh Brighton & Hove Albion chak zawk an hmachhawn ang.