Covid-19 in League Cup tibuai

Thawhlehni zan League Cup third round-ah Leyton Orient leh Tottenham Hotpur te inkhel tur an ni a, amahrawhchu League Two club player zingah Covid-19 positive an awm nual avangin inkhel hi ṭhulh a ni.

Orient player-te hi Inrinnia Mansfield nen an inkhelh zawhah test an ni a, Covid-19 vei a awm tih an hmu chhuak. Tun season-ah English Football League club-a player leh staff-te tan coronavirus test hi tih ngei ngei tur a ni lo. Orient chairman Mark Travis chuan, "Thleng nawn leh thei chu ni se la, test hi kan duh tawh lo ang. Chutihrualin test lo ilang chuan football tan a ṭha lo a, hriselna atan a ṭha lo. Dan a awm miau avangin hrem theih kan ni lo a, Premier League club-te sum lakluh a tam a, anni zarah kan test thei chauh zawk a ni," tiin a sawi.

League Two club player-te hi zing tinin Covid-19 chungchang zawhna zawh ṭhin an ni a, Spurs-in an test man an tum sak theih avang chauhin test hi nei an ni. Orient player zingah positive an awm tak avangin inkhelh ṭan hma darkar hnihah inkhelh tur ṭhulh a nih thu an puang a, he thu ziah lai hian League Two club hi an disqualify dawn nge inkhelh hun an siamrem dawn tih hriat a la ni lo.

Fixtures awm danah chuan Orient leh Spurs inkhela chak zawk hian an mualah September thla tawp hian Chelsea leh Barnsley inkhela chak zawk an hmachhawn dawn. Tottenham Hotspur hian September 24, Ningani zanah Macedonia club KF Shkendija nen Europa League qualifying third round an khel dawn. Jose Mourinho hote hian he round thleng tur hian Bulgarian club PFC Lokomotiv Plovdiv chu 2-1 in an hneh hram a ni.