UEFA super Cup Nomawi nen Real-in bul an tan

Real Madrid-in an thiam-puipa Cristiano Ronaldo leh Gareth Bale tel loin season thar atan an match hmasa ber an khel a, an talbuai phah lo - Champions League champion lai team hian Thawhlehni zan khan UEFA Super Cup chawi turin Europa League nomawi kawltu Sevilla chu 3-2 in an hneh.

Lerkendal Stadion, Nor-way-a inkhelah hian Real Madrid tana a match hmasa berah Marco Asensio chuan goal ropui khungin a club hma a hruaipui a, Sevilla-in Franco Vazquez hmangin chawlhlawk hmain an sut.

Second half-ah Yevhen Konoplyanka chuan penalty
aṭanga goal khungin Sevilla hma hruaipui ve leh mah se injury time-ah Sergio Ramos chuan an si phurh hi a sut a, Sevilla vanduai belh--chhah turin defender Timothee Kolodziejczak chu hnawhchhuah zui a ni.

Extra time khelh a ni a, penalty hmanga chak zawk zawn a ngai mai dawn niin a lang hman. Mahse, hun tawp nan minute khat chiah a awm tawh tihin defender Dani Carvajal chuan solo goal ropui a khung a, a tawpah Champions League nomawi chawitu an ropui zawk.

Zero to hero

Real Madrid captain Sergio Ramos-a'n 1-1 a team pahnih an inhnehtawk laiin penalty area chhungah Sevilla forward Vitolo a tih tluk avangin penalty a chawi a, minute 72-na a nih tawh avangin Spanish defender chetsual hi a hun lo hle.

Mahse, captain huaisen hian a tihsual thaibo turin theihtawp a chhuah a, tlawm mai tur anga an lan hnu injury time minute 90+3 naah an si phurh sutna goal khungin khelmual chhungah hruaitu ṭha a nihzia a lantir.

Real Madrid coach Zine-dine Zidane chuan, "Sergio Ramos hi kan captain a ni a, player pawi-mawh tak, no-mawi kan mamawh apianga min hlawhchhuah sak ṭhin-tu a ni. Sergio hi a tihtur leh tih loh tur chungchangah a hranpain engmah ka hrilh lo, ani ang player hi chuan danglamna an thlen fo thei a ni," tiin a captain chu a fak hle.

Sevilla an hmuhnawm

Europa League nomawi chawi tura Liverpool hnehtu Sevilla-in season thum chhung Europe club inelna sang ber dawttua champion puitu Unai Emery chu Paris St-Germain lakah an chan a, a thlak tur hian nikum Copa America-a Chile champion puitu Jorge Sampaoli an lalut.

Argentine manager en-kawl-na hnuaiah Sevilla an hmuh-nawm a, La Liga-a an elpui tur Real Madrid an hma-chhawnna inkhelah an hlau bik lo - injury time-ah defender Ti-mothee Kolodziejczak hnawhchhuah a nih avangin kim lo chungin extra time minute 30 an khel a, a tawpah an vanduai. Sevilla hian season thum chhung UEFA Super Cup an khel tawh a, an la chak lo vek!

Hei erawh hriatreng a ṭha, Real Madrid hian Euro 2016 final-a inhliam Cristiano Ronaldo an la chhawr thei lo a, Euro khelh chauh vangin Wales winger Gareth Bale leh Germany midfielder Toni Kroos te chu chawlh pek belh an ni bawk - an ṭhat dan berin an khel lo.

Zidane-a thukhawchang

Real Madrid coach Zine-dine Zidane chuan an hneh tak Sevilla khelh dan fakin, "Sevilla kha an khelh dan ropui tak vangin fak an phu a ni. A chang chuan game ropui tak chhawp chhuak tur chuan team pahnihin ropui taka an khelh ve ve a ngai a, chu chu zanina kan hmuh kha niin ka hria. A tawpah a vannei zawk ni mah ila Sevilla khel kha a ropui thlawt a ni," a ti.

I hriat ngai lo Asensio

Real Madrid player langsar tak tak karah Marco Asensio-a'n Madrid khaw club goal hmahruai ropui takin a khung a, he rawlthar attacking midfielder hi tu nge a nih reng? tih chu Spanish football ngainatute ngaihtuahnaa zawhna piang nghal a ni.

Inkhelh ṭan aṭanga minute 21-na leka goal khungtu midfielder hi kum 20 leka upa a ni a, Sevilla a hmachhawnna inkhel kha Real tana a match hmasa ber a ni! Spanish club Mallorca academy chhuak niin Spanish second division club tan hian an B team-ah kum 2013 khan bul ṭanin fourth division-ah a khel a, hemi kum vek hian senior team-ah sawn chhoh nghal a ni a, a hawikir tawh lo.

Kum 2014-15 khan second division-ah a khelh ṭhat em avangin Real Madrid scout-te chil a ti put a, pound maktaduai 3 bawr velin an lalut a, Espanyol lamah loan-in an chhuahtir. La Liga-a a season hmasa berah pawh Asensio a tlangnel nghal a, inelna hrang hrangah vawi 37 inlana goal li khungin a ṭhiante thun tur vawi 12 zet a siam sak!

Euro 2016-ah ram tan koh ni lo mah se May, 2016 khan ram tana a match hmasa ber a lo khel tawh a, Asensio chanchin hi kan la hre dawn chauh a nih pawhin a mak lo ang - Real coach Zidane chuan a rawlthar duhawm hi khawiahmah chhuahtir a tum loh thu a sawi.