Mizoramin hma a sawn zel ang - AIFF U19 coach
Mizoram Football Association chuan Thawlehni zan khan RG Stadium-ah AIFF Under 19 thlahna hun a hmang a, coach Floyd Pinto chuan Mizoramin hmasawn zawnga ke an pen zel thu a sawi bakah an thlen dana a lungawi thu a sawi.
AIFF U19 hian I Day Football-ah Chhinga Veng FC chiah an hneh nachungin an match hmasa bera Aizawl FC laka an tlawm ṭum leh match hnuhnung bera Chanmari FC an hneh loh ṭumin danglamna a awm tih a chiang hle.
AIFF U19 coach Floyd Pinto chuan, "Kan team hi thla khat bawr vel leka upa kan ni a, hmasawnna tur kan la nghah hle. Mizoramah thil tam tak kan zir a, inelna ṭha tak kan hmachhawn avangin kan lungawi. I Day Football khelh theihna hun remchang kan nei leh ngai a nih chuan champion ngei tumin kan rawn kir ang," tiin I Day Football-a champion tur khawpa ṭha an la nih loh thu a sawi.
Mizoram hmasawnna tur chungchang sawiin Pinto chuan, "Mizoramin India team a thlen vawi khatna a ni a, kan mamawh tur ang an hre kim bik lo. Amaherawhchu kan duh ang zawng zawng tihlawhtling lo mah se an theihna zawng zawngin min
ṭanpui a, an theih phak baka min puih hial avangin an chungah hian kan lawm takzet a ni. Mizoram hian India team leh a tlukpui team hi a la thleng chho zel ang a, tuna kan team min thleng hi hmasawnna ṭha tak a ni thei ang," tiin Vanglaini palai a hrilh.
MFA honorary secretary Lalnghinglova Hmar chuan, " I Day Football-a AIFF Under 19 khel tura kan sawm hian Mizoram boruak danglamna (high altitude) bak tiam theih kan nei lo a, Goa-a an training-na hmun aia kan ṭhat zawkna chu boruak leh inelna ṭha tak chiah a ni. Kan sawmna ngai pawimawhin I Day Football an rawn khel a, group stage paltlang lo mah se helaia an awm chhunga hmasawnna ka hmuh avangin kan lawm a ni," tiin mikhual team chungchang a sawi.
AIFF Under 19 team hian nimin khan an awmna hmun Goa lam panin Mizoram an chhuahsan a, he team-ah hian Mizo pasarih Emund Lalrindika, Zonunmawia, Lalengzama Vangchhia, B. Lalnuntluanga, Rohmingthanga, Lalliansanga leh Joseph Lalsanglura te an awm a ni.