Season khat aia tam Spurs-ah Bale a châm thei

Thawm bengchheng tak kara Real Madrid aṭanga Tottenham Hotspur zawmtu Gareth Bale chu London club-ah season khat aia tam a cham theih tur thu a agent Jonathan Barnett chuan 

a sawi. 

Bale hian Spurs hi season khat chhung atan loan-in a zawm a, mahse Barnett chuan a player hian Premier League club-ah hian season khat aia tam hun a hman theih a beisei a ni. 

Barnett chuan, "Beisei anga thil a kal a nih chuan London club-a cham hi pawi kan ti dawn lo. Bale hian he club tana khelh hi a duh a, kum khat dang contract a pawtsei duh a nih pawhin buaina a awm turah ka ngai lo," a ti. 

Kum 31 mi Bale hian Real-ah kum 2022 thleng cham turin contract a nei a, tuna a lan dan chuan season khat hnuah Real tan a khel leh dawn - mahse Barnett hian hei hi a thlen loh a beisei. 

A hlawhtling dawn 

Kum 2019 nipui lai khan Bale hian Real Madrid chhuahsan turin a puanthuah a tel hman a, mahse Spanish club hian Chinese Super League lam pana chhuak hman ṭep an player chungchangah an rilru an thlak a, a chhuak leh lo. 

Santiago Bernabeu-ah Bale cham mah se Zinedine Zidane-a'n a chhawr duh chuang lo a, club chhungah hei hian neuh neuh a siam reng bawk avangin tun nipuiah meuh chuan Spurs lamah an kir tir ta. 

Barnett chuan, "Real-a kir leh lam hi chu kan sawi loh ngei ka beisei. Tottenham-ah hian a hlawhtlin dawn avangin Bale hian cham ngei a duh ang a, a duh anga contract ziah chu thil buaithlak a niin ka ring lo," a ti!

Kum 2015-a a hunlaia footballer manto ber ni tura pound maktaduai 85-a Real pantu Bale hian Madrid khaw club tan nomawi lian tham 13 zet a chawi hman a, league match 171-a khelhah goal 80 khungin assist vawi 40-a nei thei. 

Hliam vangin Real Madrid-ah Bale a buai ngun a, hetichunga club tana a record erawh uanpui tham a ni - mahse, Zidane nen an buaina piah lamah Welsh forward hian fan-te aṭang pawhin a phu angin zahna a dawng tawk lo a, 2018-19 season-ah phei kha chuan auh el hial a tawk ṭhin. 

Barnett chuan, "Ka ngaihdanah chuan club tana a hnathawhte ngaihtuahin zah a hlawh tawk lo a, chu chu a dik lo a ni. Dem bik neih a rem lo a, mahse kum sarih chhunga club tana a hnathawh thlir hi chuan hei aia enkawl ṭhat zawk hi a phu a ni. 

"Tumah dem bik a, sel pawh ka tum lo. Mahse, a chunga fan-te chet dan kha a zahthlak a, club-in an pui lo bawk - hei zawng hi ka sawi theih chu a ni," a ti a, Real-a a player enkawl a nih danah a lawm lo. 

Barnett chuan, "Football khelh nuam a tihna tak tak kha nei let a, a theihna anga a khelhchhuah leh ka beisei a, a kutah engkim a innghat thung," a ti zui a, a player chuan fans leh club puihnain par a chhuan leh theih ngei a beisei. 

Bale hi chhuak tur anga sawi thawm awm reng mah se a hlawh hnem avangin European club danga a chhuah hi an ring lutuk lo - mahse rin loh takin a club hlui Spurs lamah a kir a, London club hian uchuak takin player hlawhah sum an seng ngai lo. 

Barnett chuan, "Tottenham chairman Daniel Levy nen kan titi a, Bale chungchang kan sawi chhuak. Levy hnenah hian Bale an lak theih dan ka sawi a, ani a lo phur em em bawk. Chu zawng chu inbiakna kan neih dan chu a ni mai. 

"Thilmak danglam a thleng hran lo a, rei tak kan titi a, a hlawhtling a ni mai. Levy hian Bale hruai kir hi a duh reng ṭhin a, engemaw vangin a thleng lo mai mai ṭhin. Tunah erawh a che hmasa ber an ni a, a hun takah an che a ni," a ti. 

Bale hi Wales tana a inlanna lamah a khupah a inhliam avangin a la inlan thei rih dawn lo a, Spurs chuan October international break zawh lamah an player hi an chhawr theih an beisei thu an sawi - match nga chu a la inlan dawn lo chiang tihna a ni.