Community Shield kawltu United hi le...

Manchester United-in Louis van Gaal-a hnuaia Champions League an khelh phak loh hnuah Jose Mourinho an lalut a, Portuguese manager hi club dang elpha turin a mamawh ang player lak phalsak a ni bawk.

#Pogback

Mourinho-a'n thuthar thehdarhtute a hmachhawn hmasak berah player pali lak a tum thu a sawi a, United thuneitu lamin sum thehchhuah an hreh loh bawk avangin nipui bazarah 'The Special One' a thusawi dikna a lang.

Central defender Eric Bailly chu United competitive match hmasa berah man of the match a thlan a ni a, Community Shield-a chakna goal khungtu Zlatan Ibrahimovic lah man nei loa lakluh a ni bawk. PSG striker hlui Zlatan leh Borussia Dortmund aṭanga lakluh Henrikh Mkhitaryan ten season liam taa league-a an goal khung leh assist belkhawm chu 49 goals leh 26 assists a ni.

Transfer pali zinga a tawpna berin thawm a nei lian ber a, Italian champion Juventus aṭangin Europa League khel tur Manchester United-in Paul Pogba an lalut. French midfielder hi khawvel player manto ber a nih avangin Premier League
ṭan hunah en bik a hlawh ang.

Club hlawhtling

Premier League ṭan hnua club hlawhtling ber chu Manchester United niin vawi 13 an champion tawh a, vawi thum champion tawh club hian Mourinho kaihhruaina hnuai-ah a vawi 14 nan champion an tum ang.

Manchester United hian Sir Alex Fer-guson-a chhuah hnuah nomawi an la chawi leh loh bakah a sang pali zingah ṭum hnih ngawt an awm tawh lo. Red Devils hian season li chhung a zawna champion loh an la nei ngai lo a, Mourinho hote hian record duhawm lo tak pumpelh hi an tum dawn a ni.

Special One

United siam liantu tak takah Sir Alex Ferguson-a ngaih theih a, amaherawhchu Scottish manager meuh pawh hian Jose Mourinho chak percentage a tluk pha lo. Premier League manager zingah 'The Special One' hian chak percentage a nei ṭha ber.

Chak % nei Ṭha manager

Manager Pld Won Drawn Lost Win %

Jose Mourinho 212 140 44 28 66%

Sir Alex Ferguson 810 528 168 114 65.2%

Carlo Ancelotti 76 48 13 15 63.2%

Roberto Mancini 133 82 27 24 61.7%

Manuel Pellegrini 114 70 21 23 61.4%

FA Cup champion

Sir Alex Ferguson-a chhuah hnuah David Moyes, Ryan Giggs (coach lailawk) leh Louis van Gaal te'n Manchester United an enkawl tawh. Dutch manager Van Gaal hian season liam ta khan Champions League khel tur khawpin a chetṭhat pui lo - pound maktaduai 250 bawr vel chu awmze nei loah a chhuahah a ngaih theih.

Amaherawhchu Dutch manager hnuaiah United-in kum 12 hnuah FA Cup nomawi an chawi a, league-ah goal 35 chiah chhuahin Tottenham nen goal venghim ṭha ber an ni.

Mourinho hnuaiah

Jose Mourinho hnuaiah United-in Premier League champion lai Leicester City hnehin Community Shield an chawi tawh. Hemi hma hian season thara inpuahchahna inkhelah Wigan Athletic leh Galatasaray te hnehin Borussia Dortmund lakah erawh an mualpho thung.

Turkish club Galatasaray leh Lei-cester lama goal khungtu Zlatan-a hi a ṭawng pawr zel ang em tih hi hriat a châk-awm tawh hle.

Bournemouth nen

Pathianni zan dar 6 hian United-in Dean Court-ah Bournemouth an tlawh dawn a, Mourinho hote hian inhliam vangin buaina an nei lo. Defender pahnih Chris Smalling leh Timothy Fosu-Mensah ten training an zawm leh tawh a, inhliam thar lam an nei lo.

United tana thu lawmawm chu Luke Shaw rawn kir hi a ni a, English left back hi ngal ruh tliak vanga hun rei tak a chawlh hnuah ngai a awh leh tawh.

United manager Jose Mourinho chuan, "Kan thil tum ka sawi dawn hi chuan ka inngaitlawm thiam lo a, huai taka sawi chi ka ni. Engkim ka duh a, match zawng zawng chak ka duh a, ṭha taka khelh ka duh a, goal khung ka duh ang thoin goal chhuah loh ka duh. A tih theih zawng zawng tih hi ka duh a ni," tiin a theina apianga champion a tum thu a lo sawi tawh.

Portuguese manager hnuaiah United-in Community Shield an kawl nghal a - an hmabaka awm chu Premier League, Europa League, FA Cup leh League Cup te a ni.