Sania Mirza leh Martina Hingis inthen
India tennis star Sania Mirza leh Martina Hingis te chu doubles-ah an ṭangdun tawh dawn lo! Indo-Swiss duo hi thla 16 an inkawp hman a, hnuhma ropui leh theihnghilh ngai tawh loh tur an hnutchhiah.
Nikum March thla khan Mirza leh Hingis te hi an
ṭangdun ṭan a, Indian Wells, Miami leh Charleston-ah te champion nghalin India nula hi a vawi khat nan double-ah world number 1 a nih phah hial. Grand slam lamah pawh an che fuh chho zel a, Wimbledon leh US Open-ah te champion zuiin hneh theih loh ang hiala ngaih an ni.
PTI zawhna chhangin Sania lamhnai tak pakhat a hming tarlan loh chuan, "An thawhdunna chu a tawp ta. Tun hnai thla nga chhungin beisei ang result an nei thei lo a, WTA ranking-a 100 hnuai lam te an hneh lo hial! Kan duh leh beisei ang thil a thlen loh chuan kawppui thlak a ngai
ṭhin,"tiin a sawi.
World record
Mirza te ṭhiandun hi an inkawp fuh hle a, kum 2015 chhung khan inelna pakuaah ngawt an champion hman. Kumin Janury 13 khan WTA Sydney International semifinal-ah Raluca Olaru leh Yaroslava Shvedova te lakah 4-6, 6-3, 10-8 in hnehna an chang a, hmeichhe doubles a chak zawn rei thei ber record thar an siam.
Rican Gigi Fernandez leh Natasha Zvereva te ṭangdun chuan kum 1994 khan a zawnin match 28 chhung zet hnehna an chang thei a, he record duhawm tak hi kum 22 chhung ngawt khum theitu awm lo mah se Mirza te hian an thaichhiatsak a ni.
A harsa ṭan
Sania leh Hingis te hian kuminah kum bul an ṭan chhe lo a, inelna lian pathumah an champion. Grand slam hmasa ber Austrlian Open-ah pawh an hlawhtling. February thla chawhnu lam aṭangin an che fuh hleithei lo a, tun hnai thla nga chhungin final vawi thum khel mah se Rome-ah chiah an champion a, beisei leh duhthusam an thleng zo lo.
Engtin zel..
Kum 29-a upa Sania hi world number 21 Barbora Strycova nen an ṭangdun zui dawn. Czech Republic nula nen hian an match hmasa ber atan kumina Grand slam hnuhung ber US Open-ah an inlan dun ang. Hetihlai hian Hingis erawhin United States nula Coco Vandeweghe a ṭanpui thung dawn a ni.