Police rawih nan United inseng hnem

Manchester khaw club pahnih United leh City chuan season hman zawh takah khan police rawih nan Premier League club-ah an inseng hnem ber a, an club pahnih insen zat belhkhawm hi pound maktaduai 1.8 bawr vel a tling pha hial a ni.

Metropolitan Police chuan thu-chhuah siamin police-in an tihtur venhimna pangngai an pek piah lama club hmunhma vel venhim sak a ngaihin club-te hi sum an chawitir ṭhin thu an sawi.

Premier League club zingah Manchester City an inseng hnem ber a, season hman zawh taka police rawih nana an sum sen zat ringawt hi £944,195 niin an hnuai chiahah hian £925,126 sengtu Manchester United an awm.

Club lian zingah Liverpool chuan £544,550 sengin police rawih nana sum sen hnem lamah Manchester khaw club pahnih chiah an chungah an awm a, Chelsea chuan £94,388 sengin pangana dinhmun an luah.

Manchester ang thoin Liverpool khawchhuak club tan venhimna uluk a ngai a, Everton chuan £396,088 sengin palina an ni. Club lian zingah Arsenal an inseng tlem ber a, police rawih nana an sum sen zat hi £32,536 niin pasarihna an ni.

Inkhel lian tham a awm dawn apiangin club-ten venhimna an uluk lehzual a, police rawih nan an sum sen a pung ṭhin. Sum sen hnemna inkhel te chu; Etihad Stadium-a Man-chester Derby, Liverpool vs Man-chester United, Tottenham vs Arsenal, West Ham vs Spurs, Crystal Palace vs Charlton (League Cup) Leicester vs Everton (Foxes hnena Premier League nomawi hlanna inkhel)