Zanin dar 12:30-ah Super Cup Bayern Munich Vs Sevilla
Puskas Arena, Hungary-ah zanin dar 12:30 hian UEFA Super Cup-ah Bayern Munich leh Sevilla te an inkhel dawn. Bavarians hi Champions League champion an ni a, Spanish club hi Europa League champion an ni thung.
Hansi Flick-a hote hi Champions League champion an ni satliah lo a, season liam ta khan Bundesliga leh DFB Pokal-ah an champion tel bawk. Tun season-a an match hmasa berah Schalke 8-0 in an sawp a, an la che ṭha tluang hle.
Sevilla hian Inter Milan hnehin Europa League nomawi an chawi a, La Liga-ah la inlan loin friendly match-ah Levante 3-2 in an hneh tawh thung. Julen Lopetegui hote hian nomawi chawi turin Italian club ṭha bakah Manchester United te an hneh a, Bavarians tan vanduai theihna a ni.
Chutihrualin Bayern hi match hnuhnung 31-ah vawi 30 an chak a, goal 106 zet an khung. Polish striker Robert Lewandowski-a'n kum 2020-a competitive match 15 a khelh aṭangin goal 16 a khung.
Lewy ringawt pawh hi Sevilla tan buaina tham a tling a, Bavarians hian league match hmasa ber an khelh dan aṭangin Thiago Alcantara, Ivan Perisic leh Philippe Coutinho te awm loh an tuar lo tih a lang.
Bayern player thar Leroy Sane-a'n Schalke nen goal a khung bakah player ṭha bik a nih zia pholang a; Thomas Muller, Serge Gnabry leh Leon Goretzka te nen an inkawprem nghal hle. German chanchinbu lam chuan Sane leh Gnabry inkawp hi Arjen Robben leh Franck Ribery te inkawp Robbery an tih ang deuh khan 'Sanabry' hming lem an pe leh der tawh.
Sevilla hian Europa League an champion-na kawngah player pawimawh Ever Banega chan mah se player langsar Ivan Rakitic chu Barcelona aṭangin an la let a, Real Madrid aṭangin hmabak nei êng Oscar Rodríguez te an la bawk nen German club tan en liam ngawt an rem lo.
Spanish club hian Europa League vawi ruk ngawt an champion tawh avangin Super Cup vawi ruk an khelhna tur a ni a, chutihrualin Super Cup-ah vawi khat chiah nomawi an la chawi. Bayern pawh Super Cup-ah inchhuang thei an ni lo, kum 2013-a Chelsea hneha an chak bak nomawi an la chawi lo.