Bengaluru-ah Spanish player pahnih

I League champion Bengaluru FC chuan coach thar Albert Roca enkawlna hnuaiah player an lak belh zel a, Spanish second division club Real Valladolid aṭangin defensive midfielder Alva-ro Rubio leh Real Madrid B team defender hlui Juan Antonio Gonzalez Fernandez te an lalut.

Kum 37-a upa Rubio hian Real Zaragoza-ah bul ṭanin Valladolid hi kum 2006 khan a zawm a, season 10 a cham chhung-in La Liga leh Segunda division-ah match 296-a khel a ni. Kum 1999-a FIFA Under 20 World Cup champion Spain team-a tel phak Rubio hian Bangalore club tan hian thla li chhung atan contract a ziak a ni.

Real Madrid B team defender hlui Juanan hi kum 29-a upa niin Hungary club ṭha Ujpest tan 2014 khan Hungarian Cup nomawi a lo chawi tawh a, season hman zawh takah khan North American Soccer League club Rayo OKC tan khelin South Indian club-ah hian season khat khel turin contract a ziak.

AFC Cup quarterfinal khel tur Bengaluru hian Spanish player pahnih an lakluh hma hian Australian midfielder Cameron Watson chu A League club Newcastle Jets aṭangin an lo lalut tawh bawk.