I Day Football 2016 Ramhlun North-in semifinal an thleng

Mizoram Premier League kai thar Ramhlun North FC-in Bethlehem Vengthlang FC hnehin I Day Football semi-final an lut.

Nimina group match hnuhnung berah hian Ramhlun North tan B. Malsawmzuala, Lalthlamuana leh Jerry F. Zonunsanga ten goal an khung a; Group B aṭanga Shillong Lajong FC hnungzui turin Bethlehem VT chu 3-0 in an hneh.

I Day Football semifinal hi August 12, Zirtawpniah khelh a ni ang a, chawhnu dar 2:00-ah Group B pahnihna Ramhlun North FC-in Group A hmahruaitu Chanmari FC an hmachhawn ang.

Zan dar 7:00-ah I League club Shillong Lajong FC leh Aizawl FC ten semifinal hnuhnung zawk an khel bawk ang.

Zo United mangṭha

Shillong Lajong coach Thang-boi Singto chuan, "Kan club bitum tawh zingah Zo United an ṭha ber," tiin Zo United fak mah se Vanlalrova hoten knockout stage an thleng pha lo.

Zo United hian Shillong club chiah hneh loh an tawng a, Dinthar FC an hneh nachungin BVT leh Ramhlun North lakah point khat chiah an hlawh chhuah avangin a sang pali zingah an tel pha lo.

Group khatah team panga an awm avangin khel zo hmasa bik club an awm a ngai a, Zo United an vanduaiah a ngaih theih.

Rova hote hi hun rei tak pahnihna an ni a, amaherawhchu a pawimawh hunah pathumna an nih tak avangin I Day Football aṭangin an tla.

A hunah an rah

Nimin inkhelah Bethlehem Vengthlang forward Lalram-muan-puia'n Ramhlun North defender tihsual vangin chance ṭha hmasa ber a nei a, a pet fuh tawk lo.

Ramhlun North hi an tihsual vanga ben harha awmin inkhel an thunun zui a, MC-a leh Jerry F. Zo-nunsanga ten goal khung theihna turah an pet goal lo.

BVT wing back Hming-thanmawia'n freekick aṭanga crossbar a pet per hnuah Ram-hlun North forward Thlamuana'n Sawmtea tan ball ṭha siam sakin goal hmahruai a lut nghal bawk.

Minute 27-naah Luangmual FC striker hlui Sawmtea hian hun pawimawhah a chakna leh a tawnhriat a hmang ṭha a, BVT keeper Lalmuansanga awmna a hriat chian bawk avangin goal
ṭha a khung.

BVT-in chak tumin bei ngial mah se an teammate Lalrinawma Lianhna thihna vangin inkhel turin an la inpeih tawk lo tih a lang a, an zin chau tih a lang. Second half
ṭan aṭanga minute sarihna lekah goal hmahruai khungtu Sawmtea cross chu Thlamuana'n a khung ve thung a, injury time-ah Jerry-a'n chak nemnghehna goal a thun. MPL kaithar tan tawnhriat nei ṭha Sawmtea leh Thlamuana te a hunah tak an rah.

Lawm a kim lo

Ramhlun North goal khungtu Sawmtea'n goal a khung hnu lawkah goal khungtheihna hun
ṭha a nei leh a, ṭul lo taka a kut a hman avangin yellow card pek a ni. Mizoram Police tan pawha khel tawh Sawmtea hian match hmasa lama yellow card a hmuh tawh avangin Chanmari FC a hmachhawn ve dawn lo.

MPL kaithar defender pawi-mawh Lalruatfela'n insum theih loh vangin second half-ah yellow card a hmu a, Lawngtlai tlangval hi hrem vangin semifinal-ah a inlan thei lo bawk ang.

Ṭantu nei ṭha Ramhlun North

Ramhlun North coach Lal-ruatliana Sailo chuan, "Shillong Lajong khan kan lamah goal li an khung a, kan chak lo chiang. Chutichung chuan Ramhlun North mipuiin min phatsan lo a, hun tawp thlengin minti phur turin min au char char. Semifinal kan thlen theihna kawngah kan supporter-te hi an pawimawh takzet a ni," tiin anmahni ṭantute a fak.

Coach Tawia sawi ang chiah hian I Day Football khelh meka supporter nei ṭha ber chu Ramhlun North an ni. Zirtawpni tlai hian semifinal-ah supporter nei ṭha ber ang hiala chhal ṭhin Chan-mari FC an hmachhawn dawn.

Eng nge an sawi?

Bethlehem Vengthlang coach Lalbiaksanga Colney chuan, "Rintea thihna avangin ngai kan la awh lo a, theihtawp chhuah mah ila kan ṭhat theih dan berin kan la inlan thei lo. Fitness lamah ṭan kan ngai a, theihtawp chhuahin MFA Super Cup atan kan inpuahchah ang," tiin Vanglaini palai a hrilh.

Ramhlun North boss Tawia chuan, "Kan inkhelah hmasawnna hmuh tur chu a awm ngei a, kan ṭha ta hluai e tihna erawh a ni lo. BVT khan rin lawk ang chiahin a tir lamah chuan min nawr ve viau mah se Lunglei lama an zin avangin an la chau a, an ṭang rei thei lo. Semifinal kan thleng hi a lawmawm a, kan team theihna chin erawh kan hriat reng a
ṭha," tiin goal thum laiin chak mah se a ṭawng uang duh lo.

MPL-a FC RS Annexe lo enkawl tawhtu Tawia hi a player-te khelh danah a lungawi a, referee chungchangah erawh hmasawnna tur a awm thu Vanglaini palai a hrilh.