Ranieri-a'n contract thar a ziak

Premier League-a ropui taka Leicester City champion puitu manager Claudio Ranieri chuan King Power Stadium-ah season li dang cham chhunzawm turin contract a ziak a, kum khatah pound maktaduai 3 bawr vel hlawh tura ngaih a ni.

Kum 64-a upa manager chuan, "He club neitu aṭanga staff, player aṭanga fan-te thlengin phurna kan neih hi a danglam a, a ropui bik a ni," tiin Foxes-a contract thar a ziah chhan a sawi.

Italian manager chuan sawi chhunzawmin, "Season hmasa khan kan inpekna leh thawhrimnain mumang ramah min chentir a, rim taka kan thawh chhunzawm zel a, kan thinlung zawng zawng nen kan beih zel chuan hlawhtlinna kan chhar belh zel ka beisei a ni," a ti.

Foxes Vice-chair--man Aiyawatt Sriva-ddha-naprabha chuan, "Thla 12 liam taah khan hriatna zau tak leh tawnhriat ngah tak manager chu kan hmachhawpah hlawhtlinna ropui tak min chanpui beiseiin Leicester City-ah kan lalut a ni ," tiin Ranieri an ruai chu tifuh a inti hle.

Leicester City-in Premier League nomawi an chawina kawnga player pawimawh Kasper Schmeichel, Wes Morgan leh Jamie Vardy te chuan contract thar an ziak tawh a, captain Morgan chuan Ranieri-a'n contract thar a ziak chu club tan thu lawmawm a nih thu a sawi.