Murray-a'n last 16 a lut

Olympic mipa singles champion lai Andy Murray chuan a gold medal kawl lai humhim turin harsatna a la tawk lo. Argentina tlangval Juan Monaco lakah 6-3, 6-1 a hnehna changin Great Britain fachuam hian Rio-ah last 16 a lut a, quarterfinal lut tur chuan Italy aiawhtu Fabio Fognini a paltlang leh a ṭul ang.

Kum 29-a upa Murray hi tun hnaiah a khel ṭha tluang hle. French Open final-a world number 1 Novak Djokovic a hneh loh hnuah match 14 chhung hneh loh nei loin a kaltluang tawh.

Wimbledon champion Murray chuan, "Court hnunglam aṭangin ball ka vaw fuh ṭhin viau a, ka kutthlak a nat bakah tihsual ka nei tlem bawk," tiin a khelh danah a lungawi hle.

Rio Olympic-ah hian Murray hi a unaupa Jamie Murray nen mipa doubles-ah an inlan bawk a, mah se an match hmasa berah an chak lo nghal thung a ni.