Argentina lakah India chungnung

India mipa hockey team chuan Rio Olympic-ah a vawi hnih nan hnehna an chang. Nilaini zan khan Deodoro Olympic Hockey Centre -a inkhelah India team hian Kothajit Singh leh Chinglensana Singh te goal khung hmangin Argentina 2-1 in an hneh.

India hian an match hmasa berah Ireland 3-2 in an hneh tawh a, an match hnih naah Germany lakah hun tawp hma chiaha goal an chhuah vangin 2-1 in chak lo mah se Argentina an hneh leh tak avangin point ruk an hmu a, table-ah pathumna niin quarterfinal luh beiseina an nei sang tawh hle.

Zanin dar 10:00 hian India hian Group B a pahnihna ni mek Netherlands an hmachhawn dawn a, point khat chauh pawh an hmuh belh thei a nih chuan Ireland leh Canada ten an tluk thei tawh dawn lo a, knockout round an lut ang. Kumin hi 2000 hnu lamah India hian Olympic-ah match khat aia tam hnehna an chan lehna hmasa ber a ni.