RIO olympic 2016 Olympic aṭangin Serana a tla

Rio Olympic-ah beisei loh result kan hmu leh ta! World number 1 leh seeded pakhatna ni bawk Serena Williams chu seeded 15-na Ukrainian Elina Svitolina hneh loin hmeichhe singles third round aṭangin a tla. Champion lai Serena hian darkat khat leh minute 12 chhungin double faults vawi riat neiin ṭum 37 zet unforced errors a nei hman a, 4-6, 3-6 in a chak lo.

Kum 34-a upa Serena chuan, "Rio-ah hian a ṭha thei ang bera khelh ka duh, mahse kan duh ang leh beisei angin engmah a thleng thei lo. Tun ṭuma kan inkhelah chuan a khel ṭha leh chak phu zawkin hnehna an chang a, ka match lehpekah erawh tun aia ṭhain ka khel tawh ang," tiin tennis khawvel mangṭha a la tum lo hle.

Ukrainian nula Svito-lina chuan Serena hneh chu tennis a khelh hun chhunga a thil tawn ropui ber pakhat a nih thu a sawi ve bawk. Kumin French Open-ah khan Serena hian 6-1, 6-1 in Svitolina hi a lo hneh tawh, tun ṭumah erawh result dang kan hmu ta a ni.

United States aiawha inlan Serena leh Venus Williams te chu hmeichhe doubles-a an match hmasa berah an tla tawh bawk a, Serena a tlak leh takah chuan WTA ranking-a a sang pariat zingah Angelique Kerber leh Madison Keys te chiahin medal beiseina an nei tawh. Mipa lamah world number 1 Novak Djokovic chu first round-ah a chak lo nghal bawk.