French Open khel lo tur Andreescu

Bianca Andreescu chuan French Open a khelh loh tur thu a ti chiang a, world number 7 hi clay court inelna liana a inlan dawn loh bakah tun season chhungin tournament a khel tawh dawn lo tihna a ni.

Kum 29 mi Andreescu hian season hmasa a Grand Slam hnuhnung ber US Open nomawi kha a chawi a, kuminah beiseina sang tak nen season hman tum mah se hliam vangin Australian Open kha a khel thei lo.

Coronavirus vangin Wimble-don ṭhulh a ni zui a, nomawi a kawl mekna US Open-ah hri leng vangin a inlan thei lo bawk - French Open aṭanga a inhnuhdawh leh tak avangin tun kumah Grand Slam a khel dawn miah lo tihna a ni.

Canadian nula Andreescu chuan, "Hetiang thutlukna siam hi chu a harsain a hrehawm takzet. Kawng lehlamah chuan ka khup hliam hi duhthusama enkawl theihna hun ka nei dawn tihna a ni a, season thar atana inbuatsaihna chu zawi muangin ka nei nghal bawk ang," a ti.

Tun kar chhung hian French Open qualifying round an khel mek. September 28, Thawhṭanni aṭangin tournament pangngai an khel ṭan ang, hmeichhe singles world number 1 Ashleigh Barty pawh a lo inhnukdawk tawh a ni.