Phelps ropuina a zual zel

Michael Phelps chuan nimin zing khan 200m butterfly-ah United States tan gold medal a la leh ta. American swimmer hi Rio Olympic neih mekah ṭum hnih pakhatna dinhmun a luahna niin Olympic chanchinah gold medal 20 zet a kawl khawm ta a ni!

Kum 31-a upa Phelps hian hnehna chang turin minute khat leh second 53.36 a hmang a, Japan tlangval Masato Sakai chuan pahnihna dinhmun luah turin minute khat leh second 53.40 a mamawh thung - pathumna chu Hungary aiawhtu Tamas Kenderesi (1:53.62) a ni.

Champion lai South Africa tuihleuh chak Chad le Clos chu 50m hleuh tur a la awm tihah a chet ṭhat tawk loh avangin Sakai leh Kenderesi te a tluk lo a, palinaah thlengin medal a dawng pha lo.

Rio Olympic-ah hian 4x200m freestyle relay-ah Phelps a telna UYS team chuan gold an lo dawng tawh bawk a, tunkar tawp hian Phelps hi 100m butterfly-ah a inlan leh ang. He hunah hian 2012 London Olympic-a a hneh loh tawh Le Clos nen hian an inel leh ang.

Phelps hi Olympic-ah ṭum nga a inlanna niin tun ṭum hi a tan chuan infiamna khawmpui liana a telna hnuhnung ber a ni tawh ang. Hun harsa paltlanga infiamna khawvela a lo kir hnuah a theihna a lantir leh meuh chuan Phelps hian amah khing zotu a hmu rih lo.