Cherries lakah Chelsea vannei
Chelsea-in Thawhlehni zan khan an mikhual Bournemouth chu 2-2 in an inhnehtawkpui a, Stamford Bridge-a inkhel ni mah se, Blues hi an vanneih thu tarlan a ngai tlat. A chhan maw? Hun pek belhah si phurh sutna goal an khung hram vang a ni.
Blues tan ṭum dang ang thoin goal khung hna thawktu Cole Palmer-a'n goal hmahruai a khung a, Bournemouth keeper Mark Travers a bum hnuah 'cool' zetin a khung - a boruak ngam dan thlirin, kum 22 chauh a la ni hi awih a har zawk hial ṭhin.
Chelsea hian inkhel thunun zui mah se, goal dang an khung theih loh rah an tuar a, second half ṭan aṭanga rei lotêah Moises Caicedo chuan Antoine Semenyo titluin penalty a chawi.
Cherries tan Justin Kluivert chuan harsatna nei loin goal-ah a chantir a, tun season EPL-a penalty a khung vawi rukna a ni! 1-1 a nih laiin Cherries an vanduai teuh hle. David Brooks chuan ball tel loin Marc Cucurella a titlu a, referee-in hmu lo mah se video assistant referee (VAR) a inrawlh.
Bournemouth lawmna turin referee Rob Jones-a'n yellow card chiah a phawrh a, mikhual team an vannei zui. Goal an khung aṭanga minute riatnaah, penalty hlawh chhuaktu Semenyo-a'n a khung ve leh a, 2-1 a ni.
Chelsea hi an tlawm mai dawn niin a lang tawh. Mahse, hun pek belh minute nganaah freekick an hlawh chhuak a, a pettu ṭhang Palmer-a'n captain Reece James a kian - thla hnih zet hliam vanga a chawlh hnua lo kir English right back hian ṭha zetin goal-ah a chantir a, Blues tan point khat a hlawh chhuak.
Enzo Maresca enkawl Blues hi league table-ah palina an ni a, point 10 ngawtin hmahruaitu Liverpool an phak lo - match khatin an khel tam zawk bawk a, champion ai chuan, "Champions League kan khel phak ang em?" tih chu an tan zawhna a ni rih.
Blues manager Maresca chuan, "First half bik thlir chuan chak kan phu a, goal thum pawh khung thei kan ni. Second half-a goal kan chhuah chiah khan kan hnufual nghal a, chance tam tak kan siam lai kha chuan chak kan phu," a ti a, an hun ṭha neih an bawhpelh chu an chak zawh loh chhan a nih thu a sawi.Cherries lakah Chelsea vannei