Jesus khup hliam zai dawn

Arsenal striker Gabriel Jesus chu a khup vei lam hliam zai a ni dawn a, tun season chhungin a inkhel hman tawh kher lo mai thei - Gunners tan chanchin lawmawm lo lam a ni ang.

Kum 27 mi Jesus hi Manchester United nen FA Cup third round an khelh laiin a inhliam a, tun dinhmunah Bukayo Saka, Ben White, Takehiro Tomiyasu, Ethan Nwaneri leh Riccardo Calafiori te nen an chawl mek a ni.

Gunners chuan thuchhuah siamin, "Gabriel Jesus hliam chu ngun taka endik a ni a, a khup vei lam chu zai a ngai dawn. Chumi hnuah rang taka a dam leh theih nan enkawl a ni ang," tiin an striker chungchang an sawi.

Kum 2022 July thla khan Jesus hian Manchester City aṭangin Arsenal a zawm - hliam vangin a buai fo a, tun hnaiah a rawn che ṭha ve deuh, an match hnuhnung pasarih aṭangin goal ruk a khung, mahse hliam vangin a chawl leh reng dawn a ni.