Juve leh Atalanta inhnehtawk

Juventus manager Thiago Motta-a'n inhnehtawk ringawt loin chak dan an ngaihtuah tih a sawi a, mahse awmzia a la awm thei rih chuang lo. Old Lady hi an mikhualna ramah Atalanta nen 1-1 in an inhnehtawk.

Thawhlehni zan khan Gewiss Stadium-ah Serie A match pawimawh khelh niin, first half-ah goal a lut lo. Minute 54-naah Pierre Kalulu chuan Turin club tan goal hmahruai a khung.

An goal neih hi venghim thei ni se la chuan point thum an hmu ang, mahse ni dang ang bawkin Juve tlarhnung a phui lo - hun tawp dawn lamah Mateo Retegui chuan sutin point an insem.

Tun season Serie A match 20 an khelh tawhah Juventus hi an la tlawm miah lo. Mahse, ṭum 13 tehmeuh chu an khingpui nen an inhnehtawk a, point 34 chauh an la hmuh avangin pangana an ni phak hram chauh a ni.

Juve manager Motta chuan, "Khelmual chhunga kan luh hian hnehna chan tumin rilru kan siam tur a ni, tun ṭuma kan chak zawh loh dan te hi pawm thiam a harsa, tun season kal laia kan inhnehtawk nasa lutuk hi lungawi a harsa," a ti.

Italian football inelna sang berah hian season khat chhunga draw ngah ber chu Mantova an ni a, kum 1966-67 season khan league match 34 an khelh aṭangin vawi 22 tehmeuh chu an khingpui nen an inhnehtawk.

Atalanta pawh tun hnaiah a zawnin vawi thum chu an khingpui nen an inhnehtawk ta, champion beiseina la nei mah se an chunga awm Inter Milan leh Napoli te chetsual an chan a ngai tawh ang.

Inkhel dangah AC Milan chuan Como 2-1 in an hneh. Assane Diao-a goal khung chu Milan hian Theo Hernandez leh Rafael Leao te hmangin an changlet a, point thum hlu tak an hlawh chhuak.