Hammers boss leh player positive

West Ham manager David Moyes bakah player pahnih defender Issa Diop leh midfielder Josh Cullen te chu Thawhlehni zan atana an inkhelh tur an inpuahchah laiin Covid-19 an positive tih hrilh an ni.

Hammers boss leh player pahnihten coronavirus vei mah se inkhel erawh kaltlangpui a ni a, Thawhlehni zan League Cup third round-ah West Ham hian Hull City 5-1 in an sawp.

London club assistant manager Alan Irvine-a'n team a kaihruai a, Hammers tan hian Robert Snodgrass-a'n goal hmahruai a khung a, Sebastien Haller leh Andriy Yarmolenko ten goal hnih ve ve an khung.

West Ham assistant manager Irvine chuan, "Inkhelh hun hi zan dar 7:30 (BST) a ni a, inkhelh hma darkar hnihah stadium kan thleng a, zan dar 6:20 (BST) ah doctor leh physio ten positive pathum kan neih thu an sawi. Test vawi tam tak kan nei a, positive kan nei miah lo a, kan thu hriat hian min ṭhawng hle. Positive-te nen hian kan awm ho hman a, chutih rualin dan kan zawm thlap," tiin thil thlen dan a sawifiah.

England-a Covid-19 danah chuan positive-te hi ni 10 chhung inkhung hran tur a ni a. Moyes, Diop leh Cullen te hi training-naah an tel thei dawn lo a, September 27-a Wolves nen league match an khelh hunah an tel thei lo bawk ang. Hammers-in coronavirus dan an zawm ṭha a, mi pathumte hian positive an hriat veleh room hranah an awm nghal a, a rang thei ang berin stadium an chhuahsan bawk. Premier League club hian dan an zawm ṭhat avangin inkhelh hi kaltlangpui a ni.