Leeds-in tlarhnung thuam tum

Premier League kai thar Leeds United chuan transfer bazar lamah defender zawngin an mit an len a, Real Sociedad chuan an defender Diego Llorente chuan Leeds hi a zawm tur thu an sawi. Leeds hian Premier League-a an match hmasa berah Liverpool chu 4-3 in an ngam lo a, an match hnihnaah Fulham chu 4-3 in an hneh bawk - goal khung an harsat lo tih a lang a, mahse tlarhnung a phui lo. 

Kum 27 mi Diego Llorente hi centre back niin Leeds tlarhnung laia inkawp Robin Koch leh Liam Cooper-te elpui thei tura ngaih a ni a, midfield-ah chhawr theih a ni bawk. Real Madrid youth system chhuak Llorente hian Spain tan pawh match nga a lo khel ve tawh a, Leeds tan chuan a tawnhriat ringawt pawh hi ṭangkaipui tham a ni ang. Leeds hian nipui transfer-ah sum an hmang nual tawh a, Llorente hma hian Valencia forward Rodrigo (£26m), Freiburg defender Koch (£13m) leh Wolves winger Helder Costa (£16m) te an lalut tawh.