Aizawl khawpuiah taxi 3,526 awm Hlawm thuma thenin intlan chhawk dawn

September 1, 2016 aṭangin Aizawla taxi 3,526 awm mekte chu hlawm thuma ṭhenin an intlan chhawk dawn. Nimin khan Traffic SP C Lalthanmawia chuan a pisaah thuthar thehdarhtute hrilhfiahin, taxi-te chu hlawm thum - A, B leh C-ah ṭhen an ni ang a, ni tin hlawm khat zel an chawlh tur thu a sawi.

C Lalthanmawia chuan, Aizawl khawpuia lirthei tâwt lutuk tihziaawm nan sorkarah rawtna hrang hrang an thlen thu sawiin, chu'ng zingah chuan taxi intlan chhawk bakah, private motor-te intlan chhawktir pawh a tel tih a sawi a, "Taxi-ah ṭan phawt ila kan ti a, taxi intlan chhâwktir hi Traffic Management Coordination Committee thutlukna a ni," a ti.

Traffic SP sawi danin, taxi intlan chhâwk turah hian Aizawla taxi 3,526-te chu A, B leh C-ah ṭhen an ni dawn a, taxi-ah sticker belh vek a ni ang. Ni tin group pakhat châwlin, group pahnih zel an tlân chhuak ang a, Pathianni tel loin, chawlhkar khatah ni li an tlân thei dawn a ni.

Taxi intlan chhâwk hian Pathianni leh sorkar holiday a huam dawn lo a, Inrinni bikah chuan chawhnu dar 1 thleng intlan chhâwk anga kal tur a ni a, chawhnu dar 1 hnuah chuan tlan chhuah vek theih a ni ang.

Traffic police hotute chuan, Aizawla ni khat chhunga private motor leh taxi tlân zat uluk takin an zir chiang tawh ṭhin tih sawiin, "Taxi 3,500 vel an awm a, private motor aiin a tlem zawk hle. Mahse, Bazar Bungkawn tlân tlang zat motor kan chhiarnaah chuan private motor aiin taxi-te hi a lêtin an tlân tam zawk a ni," an ti.

Traffic police hotute sawi danin, tun dinhmunah Aizawl district-ah taxi 6,520 a awm a, chung zinga 3,526 chu Aizawl khawpui chhunga mi a ni.

Traffic SP chuan, sorkar hotute hnenah Aizawla private motor-te pawh intlân chhâwk turin rawtna an thlen tih a sawi a; an rawtna anga tih a nih chuan, chawhrualin Aizawlah ni tin lirthei 1,000 vel ding tura an ngaih thu leh, an rawtna chu Singapore-a an tih dan ang deuh a nih thu a sawi.

Aizawl Traffic SP-in an rawtna chungchang a sawi danin, private motor-te chu registrationn number-a a tâwp ber ang zelin calendar-a ni zat tawpna number-ah an tlan chhuak lo ang.

Motor no. 1-a tawp chu calendar-a ni 1, 11, 21, leh 31-ahte an tlan chhuak thei lo ang a, motor no. 2-a tawp chu ni 2, 12 leh 22-ahte an tlan chhuak thei lo ang. Chutiang zelin number dangte pawh an tlan chhuah loh hun turah rawtna an thlen a ni.

June 2016 thleng khan Aizawl district-ah lirthei 1,06,038 ziah luh a ni tawh a; two wheeler tam berin, 69,510 a ni a, maxi-cab 1,311 register a ni tawh bawk.