Bayern Munich an chak nuamsa

Bundesliga-ah Bayern Munich-in pakhatna dinhmun an sawhnghet a, Janaury 15, Nilaini zan khan Hoffenheim chu 5-0 in an sawp. Bavarians tan hian Leroy Sane-a'n goal hnih a khung bakah Raphael Guerreiro, Harry Kane leh Serge Gnabry ten goal khat ṭheuh an khung.

Bayern-in bul an ṭan ṭha a, Sane-a'n minute rukna lekah box chhung aṭangin kawh zetin a pet goal. Minute 12-naah Raphael Guerreiro-a'n khung belhin Bavarians wing back hian Harry Kane nen wall pass hmanga Hoffenheim tlarhnung an ṭhiah hnuah cool zetin a khung.

Mualneitu an chungnung chhunzawm a, ball-in Hoffenheim defender Kevin Akpoguma kut a per avnagin penalty an hmu. Kane rawn pen chhuakin minute 26-naah goal thumna a khung a, tun season Bundesliga-a a goal 16 khungna a ni.

Bayern-in first half-a goal thum an khung hnuin second half-ah pawh bul an ṭan ṭha a, minute 48-naah Mathys Tel-a ball vawrhluh ṭha chu Sane-a'n 'cool' zetin a khung.

Minute 66-naah Bayern-in an chunungna an lantir a, Sane, Guerreiro leh Alphonso Davies te hmangin Hoffenheim tlarhnung an ṭhiat a, Gnabry-a'n a hmawr a bawk.

Bayern-in goal an khung belh tawh lo a, 5-0 in an chak. Vincent Kompany hote hian match 17-ah point 42 an hmu a, anmahni hnaih bertu champion lai Bayer Leverkusen aiin point liin an hmu tam zawk.