Barca-in goal an khung hnem

Spanish Super Cup final-a Real Madrid an sawp hnuah Barcelona an phur chhunzawm a, Real laka goal nga an khung kha tihpalh thil thu a ni lo tih an pholang - Copa del Rey round of 16-ah Real Betis chu 5-1 in an sawp!

Barca tan Gavi, Jules Koundé, Raphinha, Ferran Torres leh Lamine Yamal ten goal khat ṭheuh an khung a, Betis tan Vitor Roque chuan penalty aṭangin goal khat khung ve mah se, awmzia a nei phak lo.

December 2024 khan Barca hian inelna hrang hrangah match nga khelin, vawi hnih chiah an chak a, vawi hnih tlawm neiin, vawi khat an draw - January, 2025 a thlen meuh chuan match li an khelh tawhah an chak fai vek a, Super Cup nomawi an nei a, Copa del Rey quarterfinal an lut bawk.

Hahdam têin...

Barca boss Hansi Flick-a'n kartawpah La Liga match an nei leh dawn tih a hria a, Super Cup final-a 5-2 ngawta Real hnehtu team aṭangin Robert Lewandowski, Marc Casadó leh Alejandro Balde a hahdamtir a, harsatna an tawh phah lo.

Catalan club hian minute thumna lekah goal an khung nghal a, Dani Olmo-a siamsak chu Gavi chuan goal hmahruai ni turin a khung. Nipui transfer a lakluh, season chawhnu lam an ziak lut thei dawn lo emaw tih hman Olmo hian chance hlauhawm a nei ve zui a, mahse, post a pet per.

Mahse, Barca hian goal khung belh loa chawlhlawk hman an duh lo. Minute 27-naah Jules Koundé chuan Yamal-a siamsak chu hnai set sawt aṭangin a volley goal a, 2-0 in chawlhlawk an hmang.

Goal a sur

Barca-in inkhel an thunun zui a, an zam lo. Kounde leh Yamal te khung belh chu video assistant referee (VAR) in offside vangin pawmsak lo mah se, minute 58-naah Raphinha chuan a khung belh a, tun season inelna hrang hrangah goal 20 khungin, assist vawi 11 a nei ta.

Catalan club an phur laklawh - minute 67-naah substitue Ferran Torres chuan an goal lina a khung a, minute 75-naah khel ṭha em em mai Yamal chuan an goal ngana a khung ve leh bawk.

Minute 80 em pawh a tlin hmain chak tur a chiang tawh, tiin a sawi theih a, Betis an inthlahdah phah lo thung. Barca aṭanga Betis-a loan-a khel Vitor Roque chuan minute 84-naah penalty aṭangin si phurh a sut ṭhen a, mualpho zualpui khuhna bak a tling zo lo.