Moyes-a hnuaiah Everton chak lo nghal
Everton-in David Moyes a let leh hnua an match hmasa berah Aston Villa 1-0 in an hneh lo. January 15, Nilaini zan inkhelah Ollie Watkins-a'n goal awmchhun a khung a, Toffees-in a chhanletna an nei lo.
Scottish manager Moyes hian kar liam taa Everton-in an ban Sean Dyche a thlak a, kum 12 dawn a enkawl tawh team-ah kirin beiseina sang tak mah se a bul ṭan dan a ṭha lo. Toffees hian match 20 aṭangin point 17 chauh an la hmu a, relegation zone an pelhna chu point khat chauh a ni.
Goal khat a tawk
Aston Villa-in Toffees an hmachhawn hmain manager thar nei West Ham chu 2-1 in an hneh a, Graham Potter hnuaiah Hammers an chak lo nghal. Unai Emery hote hian manager thar nei Everton chungah pawh zahngaihna an lantir lo a, ṭan phat aṭangin an nawr na hle.
Midfielder ball thiam Morgan Rogers-a'n chance ṭha hmasa neiin goalkeper Jordan Pickford-a'n a dang ṭha hle. Watkins pawhin first half-ah chance ṭha a nei a, Pickford chauh a hmachhawn hnuah goal zawnah a pet thei lo.
Everton forward Dominic Calvert-Lewin pawhin a hun ṭha neih chu goal zawnah a pet thei lo a, a pet ṭumah erawh goalkeeper Emiliano Martínez kal pel mah se goalline aṭangin an pet chhuahsak.
First half-ah goal a lut lo a, Villa midfielder Jacob Ramsey-a'n chance ṭha ber a hlah. Second half-ah erawh goal a lut a, minute 51-naah Watkins-a'n Rodgers-a ball pek chu um lutin cool zetin a khung. Toffees tlarhnung a pawp hle.
Everton-in siphurh sut tumin nawr bawk mah se goal hmaah Calvert-Lewin a vannei tawk lo a, Aston Villa-in an goal khat neih an humhim. Villa-in match 21 aṭangin point 35 an hmu a, palinaa awm Newcastle United point thum chauha an phak loh avangin Champions League beiseina a nung thar.
Moyes-a hmabak
David Moyes hi kum 61 mi a ni tawh a, Premeir League-ah upa berin tawnhriat pawh a ngah tawh. Everton-in Premier League an khel zel dawn a nih chuan Moyes-a'n a tawnhriat a hman ṭangkai lehzual a ṭul dawn.
Everton manager David Moyes chuan, "Tun dinhmunah chuan hmabak a hautak dawn tih hi ka hmu thiam. Sean Dyche khan player a la khawm ṭha a, chutihrualin position ṭhenkhatah chuan player kan la mamawh belh," tiin a sawi a, goal khung tur player chu an mamawh belh chu a ni.
Toffees hian match 20 aṭangin goal 15 chauh an la khung a, anmahni aia khung tlem chu table mawngphaha awm Southampton chauh an ni. Saints hian tun season match hmasa 20 aṭangin goal 12 chauh an khung.